ფონდ „ქართუს“ მხარდაჭერით განხორციელებული პროექტი - „თბილისის ურბანული ტყე“ დასრულების ეტაპზეა

ფონდ „ქართუს“ მხარდაჭერით განხორციელებული პროექტი - „თბილისის ურბანული ტყე“ დასრულების ეტაპზეა. სიახლეა ის, რომ შეიქმნა აპლიკაცია ,,თბილისის ურბანული ტყე”, რომელიც მოსახლეობას დაეხმარება ამ მიდამოების კოორდინაციაში. აპლიკაცია აჩვენებს ტერიტორიაზე შესასვლელებს, ბილიკებს, მანძილს, მოსასვენებელ სივრცეებს, რაც მეტად გაამარტივებს გადაადგილებას.

პროექტის ფარგლებში, თბილისის მასშტაბით, უკვე აღდგენილია 700 ჰექტრამდე ტერიტორია, დარგულია 700 000-მდე ნერგი და განახლებულია 45 კმ-მდე საფეხმავლო და ველობილიკი, მათ შორის, მოეწყო 20 კმ-მდე ახალი ბილიკი, მოიჭრა 52 000 გამხმარი ხე, გაკეთდა ოთხი ახალი ჭაბურღილი, რომელიც 200 ჰექტრამდე ტერიტორიას სარწყავი სისტემით ამარაგებს.

რეკრეაციული მიზნებისთვის მოეწყო მცირე ტურისტული ინფრასტრუქტურა - ძელსკამები, გადმოსახედები, ფანჩატურები, თავშესაფრები და ფრინველებზე დაკვირვების ქოხი, რომლებიც მაქსიმალურად არის შერწყმული არსებულ ლანდშაფტსა და რელიეფთან. პროექტის ფარგლებში ასევე გამოყენებულია ფრინველების ბუნებაში დაბრუნებისა და გამრავლების უნიკალური მეთოდი.

„მთავარი არსი რაც იყო ამ პროექტის, ეს არის ველურ ბუნებასთან მაქსიმალურად მიახლოებული გარემო თბილისთან, 5-10 წუთის სავალზე. ეს არის მუდმივად განგრძობადი პროექტი, რომელიც ყოველთვის უნდა განვითარდეს“, - განაცხადა ფონდ „განვითარება და გარემოს“ დირექტორმა გოჩა კობერიძემ.

„მინდა დედაქალაქის მცხოვრებლებს ვუთხრა, რომ თბილისის ხმაურიანი ადგილებიდან, დაახლოებით 15 წუთში შეძლებენ, რომ ამ ბუნებრივი რელიეფით დატკბნენ, ამოიყვანონ შვილები. დარწმუნებული ვარ, რომ მომავალში ეს პროცესი გაგრძელდება“, - განაცხადა საკრებულოს გარემოს დაცვის კომისიის თავმჯდომარე კონსტანტინე ზარნაძემ.