დისტანციური სწავლების მასწავლებლებთან სამუშაო შეხვედრა გაიმართა

მასწავლებელთა პროფესიული განვითარების ეროვნული ცენტრის „არაფორმალური განათლების’’ პროგრამის ფარგლებში, ქართული დიასპორისთვის დისტანციური სწავლების მხარდაჭერის მიმართულების ქართული ენის მასწავლებლებთან გასვლითი სამუშაო შეხვედრა გაიმართა. ინფორმაციას მასწავლებელთა პროფესიული განვითარების ეროვნული ცენტრი ავრცელებს.

„ღონისძიება მასწავლებელთა პროფესიული განვითარების ეროვნული ცენტრის დირექტორმა ეკატერინე ხუციშვილმა გახსნა. მისასალმებელ სიტყვაში ეკატერინე ხუციშვილმა საქართველოს საზღვრებს გარეთ მცხოვრები ქართველი მოსწავლეებისთვის ეროვნულ-კულტურული იდენტობის განმტკიცებისა და თანამედროვე განათლებაზე თანაბარი ხელმისაწვდომობის უზრუნველყოფის მნიშვნელობაზე ისაუბრა.

პროგრამის მასწავლებლები გაეცნენ ტრადიციული სწავლების მეთოდების ონლაინგარემოზე ადაპტირების თანამედროვე მიდგომებს, ონლაინგაკვეთილის ეფექტიანი დაგეგმვისა და დროის მართვის პრინციპებს, ასევე, ციფრული ჩართულობის გაზრდის პრაქტიკულ მექანიზმებს; გაიზიარეს სიახლეების მიმღებლობის, ემოციების მართვისა და სტრესულ სიტუაციებთან გამკლავების მეთოდები.

ღონისძიების ფარგლებში ჩატარდა პრეზენტაციები და მოეწყო დისკუსიები ისეთ მნიშვნელოვან თემებზე, როგორებიცაა:

• „სწავლების მეთოდების ტრანსფორმაცია ონლაინ სწავლებისთვის“- თანამედროვე სასწავლო მეთოდების ადაპტირება დისტანციური სწავლების გარემოსთვის;

• „ქართული ენა ემიგრანტებისთვის - მოსმენის უნარის განვითარება“ - მოსწავლეთა სმენითი აღქმისა და კომუნიკაციური უნარების განვითარების ეფექტიანი მიდგომები;

• „მდგრადობა ცვლილებებისათვის“ - პროფესიული ადაპტაციის, მოქნილობისა და გამოწვევებთან გამკლავების პრაქტიკული სტრატეგიები.

• „ქართული ენა ემიგრანტებისთვის – კითხვის უნარის განვითარება“ - ტექსტთან მუშაობის, გააზრებული კითხვისა და ენობრივი კომპეტენციების განვითარების თანამედროვე მეთოდები.

სამუშაო შეხვედრის მიზანს დისტანციურ სწავლებაში ჩართული მასწავლებლების პროფესიული კომპეტენციების გაძლიერება, თანამედროვე საგანმანათლებლო მიდგომებისა და პრაქტიკული ინსტრუმენტების გაცნობა, ასევე ონლაინ სასწავლო პროცესის ეფექტიანობისა და მოსწავლეთა ჩართულობის გაზრდის ხელშეწყობა წარმოადგენდა.

შეხვედრაში მონაწილეობდნენ მასწავლებელთა პროფესიული განვითარების ეროვნული ცენტრის „არაფორმალური განათლების’’ პროგრამის მენეჯერი, პროგრამის კონსულტანტები და ქართული დიასპორისათვის დისტანციური სწავლების მიმართულების მასწავლებლები.

მასწავლებელთა პროფესიული განვითარების ეროვნული ცენტრი „არაფორმალური განათლების’’ პროგრამის ფარგლებში, საქართველოს ფარგლებს გარეთ დისტანციური სწავლების მიმართულებით ქართული ენის 43 მასწავლებელთან თანამშრომლობს. 2025-2026 სასწავლო წლის განმავლობაში პროგრამაში საქართველოს ფარგლებს გარეთ მცხოვრები 3500-მდე მოსწავლე იყო გაწევრიანებული", - ნათქვამია ინფორმაციაში.