კობიაშვილი: ყველაფერს გავაკეთებთ, რომ ამ ფეხბურთელებმა ვეღარ ითამაშონ

საქართველოს ფეხბურთის ფედერაციის პრეზიდენტმა ლევან კობიაშვილმა გარიგებული მატჩების საქმეზე კომენტარი გააკეთა. მისი განცხადებით, ფეხბურთის ფედერაცია უმკაცრეს ზომებს მიიღებს და ის ფეხბურთელები, ვინც ამ გარიგებულ მატჩებში მონაწილეობდნენ, სპორტიდან წავლენ.

„არაფერს ფასი აღარ აქვს, ყველაფერი წყალში იყრება მათი ამ საშინელი ქმედებით, რაც ჩაიდინეს. კიდევ ერთხელ ხაზგასმით აღვნიშნავ, არ ვიცი როგორ განვითარდება მოვლენები, რა პროცესები იქნება, მაგრამ დღეს არ გავაკეთებ ისეთ კომენტარს, რომ დაველოდოთ გამოძიებას. არ მაინტერესებს, ჩემთვის გამოძიება დაწყებულია და დასრულებულია. ჩვენი ფეხბურთის ფედერაცია და ჩვენი სადისციპლინო კომიტეტი აუცილებლად იმსჯელებს ამაზე და მიიღებს უმკაცრეს ზომებს. როგორც კონკრეტული პიროვნებების მიმართ, ასევე არ არის გამორიცხული, კლუბების მიმართაც. ეს ყველას პრობლემაა, მათ შორის კლუბებისაც“, - განაცხადა კობიაშვილმა. 

მისი თქმით, კონკრეტულ საფეხბურთო მატჩებზე ფეხბურთის ფედერაციას კითხვები მანამდეც ჰქონდა: „ჩვენ გვქონდა კითხვები კონკრეტულ თამაშზე „ვიტ ჯორჯიასთან“. არც ერთი თამაში არ გამოგვიტოვებია, ვართ აქტიურები. მაგრამ გვჭირდება გვერდში დგომა. ასეთი საშინელება არ უნდა განმეორდეს. ჩემთვის ამ ადამიანების ფეხბურთი დასრულებულია. ყველაფერს გავაკეთებთ, მიუხედავად იმისა, რა გადაწყვეტილება იქნება გამოტანილი, რომ ამ ფეხბურთელებმა ვეღარ ითამაშონ. ამის გარანტიას ვიძლევი!“, - აღნიშნა კობიაშვილმა.

მისი განცხადებით, საფეხბურთო კლუბს ფინანსური პრობლემები არ ჰქონდა: „მხოლოდ ორი კვირის ხელფასი იყო გასაცემი, თუმცა არავის აქვს უფლება, რომ გარიგებული მატჩები გამართოს“. 

სახელმწიფო უსაფრთხოების სამსახურის ანტიკორუფციულმა სააგენტომ საფეხბურთო მატჩების ჩაწყობის ფაქტზე 8 მოქმედ და 3 ყოფილ ფეხბურთელს ბრალი წარუდგინა. ინფორმაცია ამის შესახებ imedinews-ს სუს-ში დაუდასტურეს.

გამოძიება პროფესიული სპორტული შეჯიბრების მოსყიდვის ფაქტზე მიმდინარეობს, რაც სასჯელის სახით 4-დან 6 წლამდე თავისუფლების აღკვეთას ითვალისწინებს. გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს.

ცნობა, რომ გარიგებული მატჩების საქმეზე ლანჩხუთის „გურიისა“და საფეხბურთო კლუბ „ვიტ-ჯორჯიას“  რამდენიმე მოთამაშე დააკავეს 19-20 მაისს გავრცელდა.