გიორგი ვოლსკი: ვისურვებდი, რომ ჩვენმა ფეხბურთელებმა, ისევე როგორც სხვა სპორტსმენებმა უფრო მეტად გაგვახარონ სტაბილური თამაშით

საქართველოს ნაკრებს გუშინდელი მატჩის დროს, „ქართული ოცნების“ მაჟორიტარი დეპუტატობის კანდიდატებიც გულშემატკივრობდნენ. ღია ცის ქვეშ დამონტაჟებულ დიდ ეკრანზე მატჩს თვალყურს ადევნებდნენ „ქართული ოცნების“ დიდუბე-ჩუღურეთის მაჟორიტარი დეპუტატობის კანდიდატი გიორგი ვოლსკი და „ქართული ოცნების“ პროპორციული სიის წევრი რიმა ბერაძე.

მატჩის ტრანსლირება, „ქართული ოცნების“ ჩუღურეთის რაიონის ახალგაზრდული ორგანიზაციის ინიციატივით, ვარდების ბაღში მოეწყო. მანამდე კი იქ კიბერ სპორტის ტურნირი გაიმართა. გუნდები ერთმანეთს მსოფლიოში პოპულარულ ონლაინ თამაშებში დაუპირისპირდნენ.

„ვისურვებდი, რომ ჩვენმა ფეხბურთელებმა, ისევე როგორც სხვა სპორტსმენებმა უფრო მეტად გაგვახარონ სტაბილური თამაშით, ჯანით, რაც აუცილებელია ასეთი პრინციპული თამაშებისათვის. იმედი გვაქვს, რომ შემდეგ ტურში უკეთ ითამაშებენ. გამარჯვება მივულოცოთ მთელ საქართველოს“, - განაცხადა გიორგი ვოლსკიმ.

საქართველოს ნაკრებს უგულშემატკივრეს მთაწმინდის მაჟორიტარი დეპუტატობის კანდიდატის ბექა ოდიშარიას საარჩევნო შტაბშიც. სპეციალურად დამონტაჟებულ მონიტორთან ათობით ახალგაზრდა შეიკრიბა და ნაკრების გამარჯვება მაჟორიტარობის კანდიდატთან ერთად იზეიმა. ბექა ოდიშარიას შეფასებით, ქართული ფეხბურთი თანდათან ვითარდება. მან გამარჯვებისა და ფეხბურთის ქომაგების გახარებისთვის ფედერაციას და საქართველოს ნაკრების ფეხბურთელებს მადლობა გადაუხადა.