გია ნიჟარაძე: მინდა შევახსენო ირაკლი აბუსერიძის მხარდამჭერებს, რომ რაგბი მათით არ დაწყებულა

ირაკლი აბუსერიძის მხარდამჭერთა ჯგუფის ერთ-ერთი პასაჟი იყო, რომ თურმე მათი დამსახურება არის ქართული რაგბის წარმატებები. მინდა შევახსენო, რომ უამრავმა ადამიანმა ათწლეულების განმავლობაში იშრომა, რომ რაგბი შემდგარიყო საქართველოში, განვითარებულიყო და მიეღწია იმ წარმატებებისთვის, - ამის შესახებ ტელეკომპანია „იმედის“ გადაცემაში „დღის ქრონიკა“ რაგბის კავშირის ყოფილმა პრეზიდენტმა, გია ნიჟარაძემ განაცხადა.

„ნამდვილად არ მსიამოვნებს ამ თემებზე ლაპარაკი, მაგრამ რეალობა ასეთია. დადგა დრო, როდესაც ყველამ უნდა დააფიქსიროს თავისი პოზიცია. ძალიან ბევრი უცნაური რამ გავიგე ბოლო პერიოდში. ირაკლი აბუსერიძის მხარდამჭერთა ჯგუფის ერთ-ერთი პასაჟი იყო, რომ თურმე მათი დამსახურება არის ქართული რაგბის წარმატებები. მინდა შევახსენო, რომ უამრავმა ადამიანმა ათწლეულების განმავლობაში იშრომა, რომ რაგბი შემდგარიყო საქართველოში, განვითარებულიყო და მიეღწია იმ წარმატებებისთვის. 1950-იანი წლები ითვლება რაგბის განვითარების დასაწყისად. პირველი ჩემპიონატი 1959 წელს ჩატარდა. გივი მრელაშვილს უდიდესი ღვაწლი აქვს რაგბის განვითარებაში, ჟაკ ასპეკიანმა შეიტანა დიდი წვლილი. დღეს რაგბი ნამდვილად ეროვნული სპორტია და თაობები შრომობდნენ იმისთვის, რომ საქართველოში რაგბი განვითარებულიყო. რამდენიმე დღის წინ ვეტერანებთან ერთად შევხვდით სოსო ტყემალაძეს. სამწუხაროდ, საბჭოთა კავშირის დროს არ არსებობდა საქართველოს ნაკრები, თორემ მერწმუნეთ, იქ მყოფთა მინიმუმ 70% იქნებოდა საქართველოს ნაკრების წევრი და თითქმის იმდენივე დაამშვენებდა დღევანდელი მსოფლიოს წამყვანი ნაკრებების შემადგენლობებს. მე არ ვამეტებ არაფერს, ბრწყინვალე მოთამაშეები გვყავდა. „აია“ სამჯერ გახდა სსრკ-ის ჩემპიონი და ეს ჩემპიონობა მაშინ ძალიან სპეციფიკური რამ იყო - უნდა მოგეგო მოწინააღმდეგისთვის, სპორტკომიტეტისთვის, პოლიტბიუროსთვის, ბრეჟნევისთვის მსაჯისთვის, რომ არარუსული გუნდი გამხდარიყო ჩემპიონი. „ლოკომოტივის“ ბრწყინვალე გუნდმა სსრკ-ის თასი მოიგო. 1990-იან წლებში ქვეყნისთვის იყო საშინელება და სპორტი პრაქტიკულად მოკვდა. ენთუზიასტი, რაგბიზე უზომოდ შეყვარებული ადამიანების ხარჯზე რაგბი არა მხოლოდ არ მოკვდა, არამედ განვითარდა კიდეც. უმძიმეს წლებში ხელმძღვანელობდა ხალხი რაგბის კავშირს. გოჩა აბაშიძე, თენგიზ რუხაძე, ბიძინა გეგიძე - ამ ადამიანების დამსახურება ძალიან დიდია. ბიძინა გეგიძის დროს გაიხსნა ფანჯარა საფრანგეთში და ჩვენს საუკეთესო მოთამაშეებს ფრანგულ კლუბებში წასვლის საშუალება მიეცათ. მან ჩაუყარა საფუძველი ძლიერ, კონკურენტულ საქართველოს ნაკრებს. მერაბ ანთაძემ უდიდესი წვლილი შეიტანა რაგბის განვითარებაში, მის პერიოდში ჩვენმა ბიჭებმა საყოველთაო პატივისცემა მოიპოვეს, თუნდაც ირლანდიასთან შკინინის ლელო გავიხსენოთ. არ დაწყებულა ეს ისტორია დღეს და როგორ შეიძლება ახლა ამ ჯგუფის მხრიდან იმის თქმა, რომ მათით იწყება ყველაფერი ამ სპორტში“, - განაცხადა ნიჟარაძემ.

საქართველოს რაგბის კავშირის პრეზიდენტის არჩევნები 10 მარტს გაიმართება.