თორნიკე შენგელია: გუშინ ორივე მხარის მხრიდან შეიძლებოდა ამ ინციდენტის თავიდან არიდება, თუმცა ადამიანები ვართ და პროვოკაციაზე ჩვენი რეაგირება იყო ბუნებრივი

ევრობასკეტზე, საქართველოსა და თურქეთის ეროვნული ნაკრების მატჩის დროს მომხდარ ინციდენტს საქართველოს კალათბურთის ნაკრების კაპიტანი, თორნიკე შენგელია სოციალურ ქსელში გამოეხმაურა.

„გუშინ ორივე მხარის მხრიდან შეიძლებოდა ამ ინციდენტის თავიდან არიდება, თუმცა ადამიანები ვართ და პროვოკაციაზე ჩვენი რეაგირება იყო ბუნებრივი. როცა მოედანზე იწყება კონფლიქტი ის იქვე უნდა დასრულდეს და მოწინააღმდეგე გუნდის წევრებს არ უნდა უბიძგებდე გასახდელში დამატებით ჩხუბის გასაგრძელებლად, მითუმეტეს ოჯახის წევრების, მეგობრების და ათასობით გულშემატკივრის წინაშე.

გარდა ამისა, როცა გასახდელისკენ მივდიოდით არ წყდებოდა შეძახილები და სხვადასხვა ჟესტიკულაციები დამატებით ჩვენს გასაღიზიანებლად.

თურქული მედიის მხრიდან მოხდა განსხვავებული სურათის წარმოჩენა, რამაც გამოიწვია აგრესიის გაღვივება თურქ გულშემატკივრებში და ისინი უტევენ ჩვენი და ჩვენი ოჯახების სოციალურ ქსელებს შეურაცხმყოფელი და მუქარის ტექსტებით“, - წერს თორნიკე შენგელია.

თბილისში მიმდინარე ევრობასკეტზე, საქართველოსა და თურქეთის ნაკრებების მატჩის მიმდინარეობისას სანაძესა და ქორქმაზს შორის ინციდენტი მოხდა, რომლის გამოც მსაჯებმა ორივე კალათბურთელს დისკვალიფიკაცია მისცეს.

მომხდართან დაკავშირებით კალათბურთის ფედერაციამ საგანგებო განცხადება გაავრცელა.