თსუ-მ FIBA ევროპის თასზე პირველი გამარჯვება მოიპოვა🏀

სუპერლიგის ჩემპიონმა თსუ-მა ფიბა ევროპის თასზე პირველი გამარჯვება იზეიმა. ლექსო ლაფანაშვილის გაწვრთნილმა გუნდმა „თბილისი არენაზე“ კვიპროსის „კერავნოსს“ უმასპინძლა და დაძაბულ ბრძოლაში ანგარიშით 63:60 დაამარცხა.

ეს ფიბა-ს მიერ ორგანიზებულ ევროტურნირში ქართული გუნდის პირველი გამარჯვებაა ბოლო 12 წლის შემდეგ.

უნივერსიტეტელებმა პირველი ნახევარი 12 ქულით წააგეს და თამაშის განახლებისთანავე 15-ით ჩამორჩნენ - შავარ რეინოლდსმა კვიპროსული კლუბი 41:26 დააწინაურა. თუმცა შემდეგ თსუ-მ საკუთარი ფარის მისადგომები გადაკეტა და მესამე პერიოდში დარჩენილ 9 წუთში მეტოქეს მხოლოდ 4 ქულა ჩააგდებინა.

კარგი დაცვის ფონზე თსუ-ს შეტევაში გზა გაეხსნა. კახა ჯინჭარაძე ჩვეულად გამოირჩეოდა, რომელსაც ზურგს უკანა ხაზი გიორგი ცინცაძისა და რატი ანდრონიკაშვილის სახით უმაგრებდა. ანდრონიკაშვილს თსუ-ში დებიუტი ჰქონდა, მან კარგად შეცვალა თსუ-ს ფეხნატკენი ტაირი ბოიკინი, რომელმაც ტრავმა მოედანზე შესვლიდან მალევე გაიმიზეზა და სათადარიგოებში თამაშის ბოლომდე გადაინაცვლა.

თსუ-ში 22 ქულითა და 9 მოხსნით საუკეთესო იყო კახა ჯინჭარაძე. 7 ქულა და 14 მოხსნა ალექსანდრე ფევაძემ მიითვალა. გიორგი ტურძილაძის ანგარიშზე 11 ქულა და 7 მოხსნა დაგროვდა, ხოლო რატი ანდრონიკაშვილმა, რომლისთვისაც ეს თსუ-ში დებიუტი იყო, 9 ქულა, 6 პასი, 5 მოხსნა და 4 ჩაჭრა მიითვალა.

ჯგუფში გამართულ მეორე მატჩში მოულოდნელი ანგარიში დაფიქსირდა. გერმანულმა „გიოტინგენმა“ იტალიაში „ვარეზეს“ მოუგო და ჯგუფშის ლიდერი გახდა. მეორე ადგილზე „ვარეზე“ და „თსუ“ არიან თითო მოგებ-წაგებით, ხოლო ბოლო საფეხურზე 2 წაგების მქონე „კერავნოსია“.

მომდევნო ტურში, 2 ნოემბერს, თსუ იტალიაში „ვარეზეს“ შეხვდება, ხოლო ერთი დღით ადრე გიოტინგენი „კერავნოსს“ უმასპინძლებს.