რუსთავში სახელოვანი კალათბურთელის რამაზ გოგობერიშვილის მემორიალური ტურნირი ჩატარდა

რუსთავის მერიის და საკალათბურთო კლუბი ,,რუსთავის“ ორგანიზებით, რუსთავის სპორტის სასახლეში, რამაზ გოგობერიშვილის მემორიალური ტურნირის საფინალო მატჩი და დახურვის ღონისძიება გაიმართა. ინფორმაციას რუსთავის მერია ავრცელებს.

ტურნირის გამარჯვებული გუნდი, თბილისის ,,რაში“ გახდა, რომელმაც ფინალურ მატჩში ზესტაფონის ,,მარგვეთს“ ანგარიშით 80:75 სძლია.

პირველ ადგილზე გასულ გუნდს, სპეციალურად, ტურნირისთვის შექმნილი გარდამავალი პრიზი, სიმბოლურად რამაზ გოგობერიშვილის შვილებმა საკალათბურთო კლუბი ,,რუსთავის" დირექტორმა გიგი გოგობერიშვილმა და კლუბის კალათბურთელმა ნიკოლოზ გოგობერიშვილმა გადასცეს.
„ჩვენი ქალაქის გამორჩეული სპორტსმენის, გამორჩეული მეგობრის რამაზ გოგობერიშვილის მემორიალური ტურნირი დასრულდა. ახალ ტრადიციას ჩავუყარეთ ჩვენს ქალაქში საფუძველი და ბედნიერები ვართ, რომ შესაძლებლობა გვაქვს, თაობებს გადავცეთ ის სიამაყის გრძნობა, რომელიც რამაზ გოგობერიშვილმა რუსთაველებს დაგვიტოვა“, - განაცხადა რუსთავის მერმა ნინო ლაცაბიძემ.
მემორიალური ტურნირის 8 სხვადასხვა ნომინაციაში გამარჯვებული სპორტსმენები, რუსთავის მერმა ნინო ლაცაბიძემ, საქართველოს სპორტის მინისტრის მოადგილე ირაკლი დოლაბერიძემ, საქართველოს პარლამენტში რუსთავის დელეგატმა ირაკლი შატაკიშვილმა, რუსთავის საკრებულოს თავმჯდომარემ მამუკა რეხვიაშვილმა, ქვემო ქართლში სახელმწიფო რწმუნებულის მოადგილე ავთანდილ ჭრიკიშვილმა და ვეტერანმა კალათბურთელებმა დააჯილდოვეს.

„სპორტის სამინისტროს სახელით, მინდა მადლობა გადავუხადო რუსთავის მერიას და ქალაქის მერს - ნინო ლაცაბიძეს, რადგან ყოველთვის აქტიურად არიან ჩართული და ხელს უწყობენ ქართული სპორტის განვითარებას. რუსთავის სპორტის სასახლეში შესანიშნავი ტურნირის ორგანიზება მოხდა, ჩატარდა სახელოვანი კალათბურთელის რამაზ გოგობერიშვილის სახელობის მემორიალი. ტურნირში მონაწილეობას საკმაოდ ძლიერი გუნდები იღებდნენ. ვულოცავ კლუბ ,,რაშს“ დამაჯერებელ გამარჯვებას და ვიმედოვნებ, რომ მსგავსი ტურნირები ხელს შეუწყობს, არა მხოლოდ კალათბურთის, არამედ ზოგადად ქართული სპორტის განვითარებს“, - განაცხადა საქართველოს სპორტის მინისტრის მოადგილემ ირაკლი დოლაბერიძემ.

საქართველოს სამგზის ჩემპიონის რამაზ გოგობერიშვილის მემორიალური ტურნირი, რუსთავის მერიის და საკალათბურთო კლუბი ,,რუსთავის“ ორგანიზებით, წელს პირველად გაიმართა და ტრადიციულ სახეს მიიღებს.