ფიონჩანგში ზამთრის ოლიმპიური თამაშები გაიხსნა

დღეს ფიონჩანგში ზამთრის ოლიმპიური თამაშები ოფიციალურად გაიხსნა. 

ფიონჩანგის ოლიმპიურ სოფელში საქართველოს დროშა საზეიმოდ გუშინ აღიმართა. ფიონჩანგის ზამთრის ოლიმპიადაზე საქართველოდან 4 სპორტსმენი - მოთხილამურეები იასონ აბრამაშვილი და ნინო წიკლაური, მოციგურავე მორის ყვითელაშვილი და მოციგავე გიორგი სოღოიანი იასპარეზებენ. 

გახსნის ცერემონიის ყველაზე მნიშვნელოვან ნაწილად ითვლება თამაშებში მონაწილე ყველა ქვეყნის დელეგაციის აღლუმი, რომელიც საკმაოდ სანახობრივია.

ტრადიცია გულისხმობს, რომ დელეგაციები მასპინძელი ქვეყნის ენის ანბანური წესრიგის მიხედვით გამოვლენ.

ოლიმპიადის გახსნის და დახურვის ცერემონიები ფიონჩანგში, ოლიმპიურ სტადიონზე ჩატარდება, რომელიც 35 ათას მაყურებელს იტევს. სამხრეთ კორეის ზამთრის ოლიმპიადა პირველია, სადაც მედლების 100-ზე მეტი კომპლექტი გათამაშდება. 15 დისციპლინაში სულ 102 შეჯიბრი გაიმართება.

შეჯიბრებები სამხრეთ კორეის ორ ქალაქში გაიმართება. ფიონჩანგის სამთო სათხილამურო კურორტი ალპენსია ცენტრალური ადგილი იქნება, სადაც ასპარეზობები ამ სახეობებში შედგება: სამთო სათხილამურო სპორტი, ტრამპლინი, ციგა, ბობსლეი, სკელეტონი, ბიატლონი და სხვა. მეზობელი ქალაქი კანინი კი ძირითადად იმ სახეობებს უმასპინძლებს, რომლებიც დარბაზში ტარდება ჰოკეი, ქერლინგი, ციგურებით რბოლა, შორტ-ტრეკი და ფიგურული ციგურაობა.

წელს რუსეთის ოლიმპიური გუნდი ფიონჩანგის თამაშებზე ნეიტრალური დროშით გამოვა, გუნდის სახელწოდება იქნება – OAR (“ოლიმპიური ათლეტები რუსეთიდან”). საერთაშორისო ოლიმპიურმა კომიტეტმა წამყვანი რუსი სპორტსმენების დიდი ნაწილი არ დაუშვა 2018 წლის ოლიმპიადაზე და საბოლოოდ, ფიონჩანგში OAR მხოლოდ 168 სპორტსმენით იქნება წარმოდგენილი.

17 იანვარს ცნობილი გახდა, რომ ჩრდილოეთ და სამხრეთ კორეა ოლიმპიადაზე „საერთო კორეული“ დროშით იასპარეზებდა. ამ ფაქტს მსოფლიო მედიის აქტიური გამოხმაურება მოჰყვა. მედიამ მომხდარი ჩრდილოეთ კორეის „ბირთვული ამბიციების“ შემცირებას დაუკავშირა. 

ოლიმპიური თამაშები სამხრეთ კორეაში 9-დან 25 თებერვლამდე ჩატარდება. შეჯიბრებაში მონაწილეობას, მსოფლიოს 92 ქვეყნიდან დაახლოებით 2,5 ათასი სპორტსმენი მიიღებს.