საკალათბურთო სუპერლიგაში გუნდების რაოდენობა იზრდება

კალათბურთის ფედერაციის ოფისში ახალი გამგეობის პირველი სამუშაო შეხვედრა გაიმართა. ფედერაციის საერთო ყრილობამ ახალ წესდებასთან ერთად გამგეობის არსებულ 11-კაციან შემადგენლობას 4 წევრი დაამატა. ასევე, სუპერლიგაში მონაწილე გუნდების რაოდენობა მომავალი სეზონისთვის 10 გუნდამდე გაიზარდა.

2018-2019 წლების სეზონის სუპერლიგის მეათე ადგილისთვის ერთმანეთს დაუპირისპირდებიან რეგულარული ჩემპიონატის დასრულების შემდეგ სატურნირო ცხრილის ბოლოადგილოსანი და „ა“ ლიგის ფინალურ სერიაში დამარცხებული გუნდი. საკვალიფიკაციო სერია მიმდინარე წლის 3-დან 10 მაისამდე გაიმართება.

ფედერაციის ხელმძღვანელობა სუპერლიგისა და „ა“ლიგების გუნდებთან სამუშაო შეხვედრებზე შეთანხმებული იყო, რომ სუპერლიგაში მომავალი სეზონიდან მონაწილეების 10-მდე გაზრდის გადაწყვეტილება კლუბებისთვის რეგულარული ჩემპიონატის დასრულებამდე უნდა ეცნობებინა.

ხსენებულ შეხვედრებზე ასევე განსაზღვრული იყო გუნდების გაზრდის შემთხვევაში, სუპერლიგაში მე-10 გუნდად გადასვლის შემდეგი პრინციპი: „ა“ ლიგის გამარჯვებული პირდაპირ გადავა სუპერლიგაში, ხოლო ფინალში დამარცხებული სუპერლიგის მე-10 ადგილისთვის რეგულარული ჩემპიონატის ბოლოადგილოსანთან საკვალიფიკაციო სერიას 2 მოგებამდე ითამაშებს.

იმ გუნდების ვინაობას, რომლებიც 2018-2019 წლების სეზონის სუპერლიგაში მე-10 ადგილის მოსაპოვებლად იბრძოლებენ, სუპერლიგის რეგულარული ჩემპიონატისა და „ა“ ლიგის ფინალური სერიის დასრულების შემდეგ შევიტყობთ.

შეგახსენებთ, რომ “ა“ ლიგის ფინალური სერია დღეს იწყება „ტიტებსა“ და „თსუ-ჰიუნდაის“ შორის, რომელიც 3 მოგებამდე გაგრძელდება.