გურამ კაშიას მიწვევას „ანდერლეხტის“ მწვრთნელს ურჩევენ

გურამ კაშია ბელგიურ "ანდერლეხტს" დაუკავშირეს. ბელგიურმა გამოცემამ გუნდის ახალ მწვრთნელს, ჰოლანდიელ სპეციალისტს იმ ათი ფეხბურთელის სია შესთავაზა, რომლებითაც შესაძლოა რუტენი დაინტერესდეს.

"ანდერლეხტისთვის" სასურველ ფეხბურთელებს შორისაა საქართველოს ნაკრებისა და ამერიკული „სან ხოსეს“ ცენტრალური მცველი გურამ კაშია. რუტენსა და კაშიას ერთად მუშაობის გამოცდილება აქვთ. ჰოლანდიელი "ვიტესის" მწვრთნელი იმ პერიოდში იყო, როცა არნემულ გუნდში კაშია ასპარეზობდა. 

ბელგიური გამოცემა ქართველი ფეხბურთელის დადებით მხარეებზე საუბრობს და აღნიშნავს, რომ „ანდერლეხტს” ცენტრალურ დაცვაში ძლიერი ლიდერი სჭირდება. ამ პოზიციაზე კი იდეალური ვარიანტი გურამ კაშიაა, რომელსაც გამოცდილება არ აკლია.

31 წლის ფეხბურთელი რუტენისთვის კარგად ნაცნობი მოთამაშეა, 2012/13 წლების სეზონი „ვიტესმა” მეოთხე ადგილზე დაასრულა, მაშინ გუნდს ჰოლანდიელი წვრთნიდა, კაშია კი ამ გუნდის ლიდერი იყო. 

ქართველის ფასი ამ დროისთვის მილიონ-ნახევარი ევროა. სტატიაში აღნიშნულია, რომ იმ შემთხვევაში თუ როტენი კაშიას მიიწვევს, ქართველი ფეხბურთელი დიდი ალბათობით დასთანხმდება. 

რაც შეეხება, "ანდერლეხტს", ბელგიის ყველაზე ტიტულოვანი გუნდი საკმაოდ რთულ ვითარებაში იმყოფება. 21 ტურის შემდეგ 34 ქულით სატურნირო ცხრილში მე-5 ადგილზეა და 14 ქულით ჩამორჩება პირველადგილოსან „გენკს.“