ჯო ბაიდენს სი ძინპინი ჩინეთის გარდაცვლილ ლიდერ დენ სიაოპინში აერია

აშშ-ის ყოფილი ვიცე-პრეზიდენტისა და „დემოკრატიული პარტიის“ საპრეზიდენტო კანდიდატობის პრეტენდენტის, ჯო ბაიდენის განცხადებით, მან 2016 წელს მიღებული პარიზის შეთანხმება კლიმატის ცვლილების შესახებ ჩინეთის ყოფილ ლიდერ დენ სიაოპინთან განიხილა, რომელიც 1997 წელს გარდაიცვალა.

როგორც „ფოქს ნიუსი“ იტყობინება, სამხრეთ კაროლინას შტატში ამომრჩევლებთან სიტყვით გამოსვლისას ჯო ბაიდენმა კლიმატის ცვლილების შესახებ პარიზის შეთანხმების მოლაპარაკებებთან დაკავშირებით თავისი გამოცდილება გაიხსენა.

„მე ის ადამიანი ვარ, ვინც დენ სიაოპინთან შეხვედრის შემდეგ დაბრუნდა და დაამტკიცა, რომ ჩინეთი შეთანხმებას შეუერთდებოდა თუ მათზე ზეწოლას განვახორციელებდით“, - განაცხადა ჯო ბაიდენმა.

აღნიშნულ წამოცდენას ტრამპის საარჩევნო კამპანია ოპერატიულად გამოეხმაურა და ბაიდენს შეცდომაზე მიუთითეს.

კლიმატის ცვლილების შესახებ პარიზის შეთანხმება 2016 წელს მიიღეს, ხოლო ჩინეთის ყოფილი ლიდერ დენ სიაოპინი 1997 წელს გარდაიცვალა. ჯო ბაიდენი კი, სავარაუდოდ, ჩინეთის ამჟამინდელ ლიდერს, სი ძინპინს გულისხმობდა.