აშშ-ში, რამდენიმეთვიანი „ვოიაჟის“ შემდეგ, ფერმიდან გაქცეული ზებრები უკან დააბრუნეს

მერილენდის შტატში მდებარე ფერმას დაუბრუნდა 2 ზებრა, რომელიც ფერმიდან ჯერ კიდევ აგვისტოში გაიქცა, - ამის შესახებ BBC წერს.

რამდენიმე თვის განმავლობაში, კერძო დაწესებულების ხელმძღვანელებმა მრავალ გზას მიმართეს, რომ ცხოველები დაეჭირათ და ფერმაში დაებრუნებინათ - შტატის მასშტაბით, სხვადასხვა ადგილას ტოვებდნენ საკვებს და აწყობდნენ სადგომებს, რათა ისინი რომელიმე ტერიტორიას მიჩვეოდნენ და დაჭერა გამარტივებულიყო. მათმა ძალისხმევამ შედეგი არ გამოიღო და საბოლოოდ, ცხოველები გარემოს დაცვის დეპარტამენტის წარმომადგენლებმა დაიჭირეს.

სულ ფერმიდან 3 ზებრა გაიქცა, თუმცა ერთი უკანონოდ დაგებულ ხაფანგში გაება, რამაც იმსხვერპლა კიდეც.

ფერმის მეპატრონე 76 წლის ჯერი ლი ჰოლია. მას აქვს ლიცენზია, რომელიც უფლებას აძლევს, საკუთრებაში არსებულ 300 ჰექტრის ფართობის მიწაზე ეგზოტიკური ცხოველები მოაშენოს.