ბლეიკ ლაივლიმ და ჯასტინ ბალდონიმ შეთანხმებას მიაღწიეს

ბლეიკ ლაივლისა და ჯასტინ ბალდონის შორის არსებული წელიწადნახევრიანი სასამართლო კონფლიქტი შევიწროების საქმეზე დასრულდა. მხარეებმა ხელი მოაწერეს მორიგების შეთანხმებას, რითაც თავიდან აიცილეს ფედერალური დონის სასამართლო განხილვა, რომელიც ორ კვირაში უნდა დაწყებულიყო.

ერთობლივ განცხადებაში მხარეებმა აღნიშნეს: „საბოლოო პროდუქტი - ფილმი „ყველაფერი ჩვენით მთავრდება“, საამაყო აღმოჩნდა ყველასთვის, ვინც მასზე მუშაობდა. ჩვენი მიზანია, გავზარდოთ ცნობიერება ოჯახური ძალადობის შესახებ და დაზარალებულებს დავეხმაროთ. ვაღიარებთ, რომ მუშაობის პროცესში წარმოიშვა სირთულეები და გვესმის, რომ ქალბატონი ლაივლის მიერ გამოთქმული წუხილი ყურადღებას იმსახურებს. ჩვენ კვლავ მტკიცედ გვჯერა, რომ სამუშაო ადგილზე არ უნდა არსებობდეს შეუფერებელი ქცევა და არაპროდუქტიული ატმოსფერო. გულწრფელად ვიმედოვნებთ, რომ ეს წერტილს დაუსვამს კონფლიქტს და ყველა მონაწილეს წინსვლის საშუალებას მისცემს“.

2024 წლის ბოლოს, 38 წლის ლაივლიმ სარჩელი შეიტანა რეჟისორისა და ფილმში მისი პარტნიორის, 42 წლის ჯასტინ ბალდონის წინააღმდეგ. მსახიობი მას გადასაღებ მოედანზე შევიწროებაში ადანაშაულებდა.

ლაივლი ამტკიცებდა, რომ ბალდონი მას საჭიროზე დიდხანს აჩერებდა ჩახუტებულ მდგომარეობაში, უფლებას აძლევდა თავს ზედმეტად შეხებოდა ინტიმური სცენების რეპეტიციისას, ერთხელ კი წონასთან დაკავშირებით დაუსვა კითხვა, რაც მსახიობმა (რომელიც 4 შვილის დედაა) საჯარო დამცირებად აღიქვა.

ბალდონიმ, თავის მხრივ, ლაივლის ცილისწამებისთვის უჩივლა და აცხადებდა, რომ მსახიობმა მას ცრუ ბრალდებები ფილმზე „კონტროლის მოსაპოვებლად“ წაუყენა.