შეეფერებით თუ არა თქვენს პარტნიორს - 10 შეკითხვა, რომელიც ქორწილამდე უნდა დასვათ

იმ ეპოქაში, როდესაც თითის ერთი დაჭერით ადამიანებს შორ მანძილზე შეუძლიათ ერთმანეთის დანახვა და დალაპარაკება, მათ შორის ურთიერთობას აადვილებს. ბარონესა ფიონა შეკლტონი დიდ ბრიტანეთში განქორწინების საკითხებში ერთ-ერთი ყველაზე ცნობილი იურისტია, რომლის სამუშაო გამოცდილებაც 40 წელზე მეტს ითვლის. ეკსეტერის უნივერსიტეტის სპეციალისტებთან ერთად, ფიონა შეკლტონმა შეისწავლა იმ წყვილებს შორის ურთიერთობა, რომლებმაც თანაცხოვრებაში დიდი ხანი გაატარეს ერთად. ინფორმაციას BBC ავრცელებს.

კვლევის ფარგლებში გამოკითხეს 43 დაქორწინებული წყვილი, რომელთაც ერთად 10 ან ნაკლები წელი ჰქონდათ ნაცხოვრები, ასევე 10 ჰეტერო და ჰომოსექსუალი წყვილი, რომლებმაც ერთად 15 წელზე მეტი იცხოვრეს.

საბოლოოდ, იურისტი და მკვლევრები მივიდნენ დასკვნამდე, რომ ურთიერთობა დიდხანს ძლებს მაშინ, თუ ის მეგობრობაზე, ურთიერთპატივისცემაზე, საერთო ინტერესებსა და რეალურ მოლოდინებზეა დაფუძნებული.

ფიონა შეკლტონის თქმით, თუ წყვილები ურთიერთობის ადრეულ სტადიაზე ერთმანეთს სწორ შეკითხვებს დაუსვამენ, შესაძლებელი იქნება მათი ნერვებისა და დროის "გადარჩენა".

წარმოგიდგენთ ბედნიერი და ხანგრძლივი ქორწინებისთვის 10 მთავარ შეკითხვას, რომელიც წყვილმა ერთმანეთს უნდა ჰკითხოს.

1. ვუგებთ თუ არა ერთმანეთს? - კვლევისას გაირკვა, რომ ბევრი ბედნიერი წყვილის ურთიერთობა მეგობრობით იწყება, ინტიმი კი მოგვიანებით ჩნდება. სწორედ ამიტომ, პირველი მთავარი შეკითხვაა, უგებენ თუ არა წყვილები ერთმანეთს, როგორც მეგორები.

2. ძლიერია ჩვენი მეგობრობა? - სპეციალისტების თქმით, მეგობრობა წყვილს რთული და მძიმე პერიოდის გადალახვაში ეხმარება, მაგალითად ახლობლის დაკარგვა ან ღალატი. 

3. გვსურს თუ არა ერთი და იგივე? - კვლევით გაირკვა, რომ ბედნიერ წყვილებს საერთო ცხოვრებისეული ღირებულებები, ოცნებები, სურვილები და მოლოდინები აქვთ როგორც პარტნიორისგან, ასევე მათთან ურთიერთობისგან.

4. რეალურია ჩვენი მოლოდინები? - როგორც გაირკვა, ბედნიერ ქორწინებაში წყვილებს ერთმანეთისგან რეალური მოლოდინები აქვთ. მათ იციან, რომ ქორწინება რთულია და მზად არიან არა მხოლოდ იმუშაონ ურთიერთობებზე, არამედ საჭიროების შემთხვევაში ოჯახის ფსიქოლოგსაც მიმართონ.

5. მხოლოდ კარგს ვხედავთ ერთმანეთში? - ფსიქოლოგები ირწმუნებიან, რომ ურთიერთობაში დიდ როლს თამაშობს თანაგრძნობა და გაგება. ეს ორი თავიდანვე არ ჩნდება, თუმცა მოგვიანებით ცოლ-ქმარს ერთმანეთის დადებით მხარეებზე კონცენტრირებაში და უარყოფითი თვისებების მოთმინებით მიღებაში ეხმარება.

6. ვცდილობთ თუ არა, რომ ურთიერთობა არ გაუფასურდეს და გაქრეს? - ადამიანებს, რომლებსაც ერთმანეთთან კარგი ურთიერთობა აქვთ, ცდილობენ მეორე ნახევრისთვის ის აკეთონ, რაც მათ სიამოვნებას ანიჭებთ. კარგი წყვილები ყურადღებით ეკიდებიან ერთმანეთის სურვილებსა და საჭიროებებს.

7. შეგვიძლია ერთმანეთთან თავისუფლად განვიხილოთ ჩვენთვის ამაღელვებელი საკითხები? - იმისთვის, რომ ძლიერი ურთიერთობა გვქონდეს, თავისუფლად უნდა შეგვეძლოს პარტნიორთან მნიშვნელოვანი თემების განხილვა. გახსოვდეთ, რომ უნარი ერთმანეთთან ყველაფერზე ისაუბროთ, პარტნიორთან გაახლოვებთ.

8. მზად ვართ ერთად გადავიტანოთ რთული პერიოდი? - სტაბილური ურთიერთობისთვის საჭიროა მეუღლეებს ცვალებად გარემოსთან ადაპტირება შეეძლოთ. როგორც წესი, ადამიანებს, რომლებსაც რთული პერიოდი აქვთ გადატანილი, კიდევ უფრო ახლობლები ხდებიან ერთმანეთისთვის.

9. გადავლახავთ ცხოვრებისეულ სირთულეებს ერთმანეთის მხარდაჭერით? - ფსიქოლოგებმა გაარკვიეს, ის თუ როგორ გაუმკლავდნენ წყვილები ცხოვრებისეულ სირთულეებს - ახლობლის გარდაცვალება, ღალატი, ფინანსური სიძნელეები, ბავშვების დაბადება (განსაკუთრებით, თუ ბავშვის აღზრდაში წყვილის როლი სხვადასხვაა),- გავლენას ახდენდა მათ ურთიერთობაზე.

10. არსებობენ ჩვენს ირგვლივ ადამიანები, რომლებიც მხარს დაგვიჭერენ? - რა თქმა უნდა, ჩვენ გვსურს, რომ ჩვენმა ოჯახის წევრებმა, ახლობლებმა და მეგობრებმა ისევე შეიყვარონ ის ადამიანი, როგორც ჩვენ გვიყვარს. აღმოჩნდა, რომ ეს წყვილის ურთიერთობაზეც დიდ გავლენას ახდენს. ეს ფაქტორი განსაკუთრებით ქალებისთვის არის მნიშვნელოვანი, რომლებიც განსაკუთრებულ მხარდაჭერას იღებენ დედებისგან, დებისა და მეგობრებისგან.