ამერიკელმა კაცმა ბიოლოგიური მშობლები იპოვა და თავად დააქორწინა

ამერიკელმა კაცმა თავისი ბიოლოგიური მშობლები იპოვა, რომლებიც მის დაბადებამდე დაშორდნენ. ისინი ხელახლა შეხვდნენ ერთმანეთს და დაქორწინდნენ. წყვილი შვილმა თავად დააქორწინა, - წერს The New York Times-ი.

ვისკონსინში, 1982 წლის ზამთარში 17 წლის მიშელ ნიუმენმა ვაჟი გააჩინა. ბავშვის მამა დეივ ლინდგრენი იყო. ახალგაზრდების მშობლები ერთმანეთის მეზობლად ცხოვრობდნენ და მეურნეობებს უძღვებოდნენ. მაგრამ ბავშვის დაბადების მომენტისთვის ახალგაზრდები უკვე დიდი ხნის დაშორებულები იყვნენ. ნიუმენი ჯერ კიდევ სკოლაში დაიოდა და შვილის აღზრდის რესურსი არ ჰქონდა. ამიტომ ბავშვი, რომელსაც მარტინი დაარქვა, შმიდტების ოჯახზე გააშვილა.
 

მარტინი ყვება, რომ შმიდტების ოჯახში თავს კარგად გრძნობდა. ნამდვილი მშობლების ვინაობის გარკვევა მან 2014 წელს გადაწყვიტა, როდესაც მისი ცოლი პირველ შვილზე დაფეხმძიმდა. ვისკონსინის ხელისუფლების დახმარებით მან დედა იპოვა. იმ მომენტისთვის მიშელ ნიუმენი ორჯერ იყო განქორწინებული, ცხოვრობდა ჰავაიზე და საქველმოქმედო ფონდში მუშაობდა, რომელიც ოჯახური ძალადობის მხვერპლ კაცებს ეხმარებოდა. მარტინის შემდეგ მას შვილი აღარ ჰყოლია.  

შვილის გაცნობის შემდეგ, რასაც მიშელი დიდი ემოციებით შეხვდა, ის დეივ ლინდგრენს დაუკავშირდა, რომელმაც მთელი ცხოვრება ვისკონსინში გაატარა. ბოლოჯერ მათ 30 წლის წინ ილაპარაკეს, როდესაც ნიუმენმა უთხრა რომ ფეხმძიმედ იყო. ლინდგრენი იმ მომენტისთვის მესამე ცოლს შორდებოდა. მას ჰყავდა სამი საკუთარი შვილი, კიდევ ოთხი გერი ყოფილი ცოლებისგან. კაცმა ქალს ჰავაიზე ჩააკითხა და მათი ურთიერთობა განხლდა.

მიშელი და დეივი ვისკონსინში 2018 წლის 4 აგვისტოს დაქორწინდნენ. ცერემონია წყვილის სახლის ეზოში ჩატარდა და მას თავად მარტინ შმიდტი უძღვებოდა, რომელმაც ამ დღემდე ცოტა ხნით ადრე დუდიზმი მიიღო - თანამედროვე რელიგია, ფილოსოფია და ცხოვრების სტილი, რომელიც ეფუძნება ძმები კოენების ფილმის „დიდი ლებოვსკის“ მთავარი პერსონაჟის The Dude-ის ცხოვრებისეულ პოზიციებს.