რამდენიმე თვის წინ გაუჩინარებული ჩინელი მსახიობი პაპარაცებმა დააფიქსირეს. ფოტოები

ჩინელი მსახიობი, მოდელი, პროდიუსერი და მომღერალი, ფან ბინბინი, რომელიც საზოგადოებამ ბოლოს 3 თვის წინ ნახა, პირველად გამოჩნდა საჯაროდ. ირკვევა, რომ ამ დროის განმავლობაში ის ჩინეთის კომუნისტურმა პარტიამ „გააქრო“. ამის შესახებ CNN-ი წერს. 

გავრცელდა პაპარაცი ფოტოგრაფების მიერ გადაღებული ფოტოები, როგორ ტოვებს ცნობილი მსახიობი პეკინის აეროპორტს. მას შავი სათვალე უკეთია და თან ახლავს კაცი შავი ქოლგით ხელში. 

3 ოქტომბერს გავრცელდა ინფორმაცია, რომ ფან ბინბინი ადგილობრივმა ხელისუფლებამ, გადასახადებისგან თავის არიდების გამო, 883 მილიონი იუანით ($129 მილიონით) დააჯარიმა.

მსოფლიოს ერთ-ერთი ყველაზე მაღალანაზღაურებადი მსახიობი ივლისის შემდეგ არავის უნახავს. მან ოქტომბრის დასაწყისში სოციალურ ქსელში პოსტი გამოაქვეყნა და გულშემატკივრებს გაუჩინარების გამო მოუბოდიშა, თუმცა არ განუმარტავს, სად იყო ამ დროის განმავლობაში. 

რამდენიმე თვის განმავლობაში, მედია ავრცელებდა ინფორმაციას, რომ ის, სავარაუდოდ, კომუნისტურმა პარტიამ „გააქრო“.

ჩინეთში, როგორც სოციალისტურ სახელმწიფოში, ხშირად სდევნიან მაღალი შემოსავლის მქონე, ცნობილ ადამიანებს. მაგალითად, 2011 წელს ცნობილი ჩინელი არტისტი აი ვეივეი სამი თვით დააპატიმრეს. ამ ხნის განმავლობაში მისი ადგილმდებარეობა გაურკვეველი იყო. ის მას შემდეგ გაათავისუფლეს, რაც დაწერა აღიარებითი ჩვენება, რომ ხელისუფლებას გადასახადებს უმალავდა. 

„თუ თქვენ ხართ მილიარდერი, ამით შეგიძლიათ ისიამოვნოთ გარკვეულ საზღვრამდე, მაგრამ უნდა იყოთ ძალიან, ძალიან ფრთხილად, რომ არ გადაკვეთოთ წითელი ხაზი და არ აღმოჩნდეთ ჩინეთის კომუნისტური პარტიის ხელში“, - ამბობს ავსტრალიის სტრატეგიული ინსტიტუტის კიბერანალიტიკოსი, ფერგიუს რაიანი. 

ფან ბინბინმა პოპულარობა აღმოსავლეთ აზიაში 1998-1999 წლებში მოიპოვა, სერიალით „ჩემი სამართლიანი პრინცესა“. 2003 წელს მან ითამაშა ფილმში „მობილური ტელეფონი“, რომელიც გახდა ჩინეთში წლის ყველაზე მაღალშემოსავლიანი ფილმი. ფილმებით „დაკარგულნი პეკინში“ (2007), „ბუდას მთა“ (2011) და „მე არ ვარ მადამ ბოვარი“ (2016) მიიღო ჯილდო არაერთი პრესტიჟული დაჯილდოების ცერემონიაზე, - როგორიცაა ტოკიოს საერთაშორისო კინოფესტივალი, სან-სებასტიანის საერთაშორისო კინოფესტივალი და აზიის ფილმების დაჯილდოება. ასევე მონაწილეობდა მრავალ უცხოენოვან ფილმში, როგორიცაა ფრანგული ფილმი „მონაკვეთი“ (2011), კორეული ფილმი „ჩემი გზა“ (2011) და „იქს-ადამიანები: მომავალი წარსულის დღეები“ (2014).

ფორბსის მიერ 2013 წელს იგი დასახელდა ყველაზე მაღალი შემოსავლის მქონე მსახიობად ჩინეთში. იგი ასევე ერთ-ერთი ყველაზე მაღალშემოსავლიანი ქალი მსახიობია მსოფლიოში.  

2015 წელს ის Time Magazine-მა ჩინეთის ყველაზე ცნობილ მსახიობ ქალად დაასახელა.