გიორგი გახარია: ჩვენი ჯარისკაცების ღირსეულ პირობებში ცხოვრების, ვარჯიშისა და შრომისთვის მნიშვნელოვანი ნაბიჯები გადაიდგა

თავდაცვის მიმართულებით აქტიური ნაბიჯებია გადადგმული და დღეის მდგომარეობით, თავდაცვის სისტემის თანამშრომლობა ჩვენს სტრატეგიულ პარტნიორებთან, ესაა ყველაზე ეფექტური და წინ წასული თანამშრომლობა. ჩვენი ამოცანაა ქვეყნის თავდაცვისუნარიანობის გაძლიერება ნატო-ს ძალებთან თანსებადობისა და მობილური, ეფექტიანი შეიარაღებული ძალების შექმნისთვის. თავდაცვის მზადყოფნის პროგრამით, რომლის ფარგლებშიც უკვე გადამზადდა 6 ქვეითი ბატალიონი, 2021 წლის ბოლომდე კიდევ სამი სამი ბატალიონი გადამზადდება. ესაა ის პროგრამა, რომელიც ქართულ ჯარს ამზადებს ქვეყნის ეფექტური თავდაცვისუნარიანობის ასამაღლებლად და იმისთვის, რომ იყოს მობილური, სწრაფი და ეფექტური, - ამის შესახებ საქართველოს პრემიერ-მინისტრმა, გიორგი გახარიამ პარლამენტში წლიური ანგარიშის წარდგენისას განაცხადა.

„ნატო-საქართველოს პაკეტის ინიციატივები, რომელშიც თავდაცვის სამინისტრო უაღრესად აქტიურია, შემდგომ წლებშიც, იქნება კიდევ უფრო ეფექტური, კიდევ უფრო გახშირებული თანამშრომლობა და ერთობლივი წვრთნები. რაც შეეხება სამხედრო სოციალურ-ეკონომიკური მდგომარეობის გაუმჯობესებას თითოეული ჩვენი ჯარისკაცისთვის - ამ მიმართულებით, განსაკუთრებით, ბოლო თვეების განმავლობაში, უაღრესად მნიშვნელოვანი ნაბიჯები გადაიდგა. დაწყებული ანაზღაურების გაზრდით, სადაზვევო პაკეტების გაუმჯობესებით, ნატოს სტანდარტების შესაბამისი უნიფორმისა და საერთოდ, იმ ინფრასტრუქტურის მოდერნიზებით, რომელიც ჩვენს ჯარისკაცებს ყოველდღიური ცხოვრების, ვარჯიშის, შრომის შესაძლებლობას აძლევს ღირსეულ პირობებში და ამისთვის სამინისტრო დღეს სერიოზულ აქტივობებს ატარებს. ასევე, ტექნიკური გადაიარაღება, რომელიც ჩვენი ჯარის ეფექტიანობის გაზრდისთვის უკიდურესად მნიშვნელოვანია. ამაში ჩვენ ჩვენი სტრატეგიული პარტნიორები გვეხმარებიან. ამასთან, აღსანიშნავია შინაგან საქმეთა სამინისტრო, როგორც შიდა უსაფრთხოებისა და მართლწესრიგის დაცვის გაძლიერების ფუნდამეტური ინსტიტუციაა. ამ სამინისტროში დღეს სისტემური განახლების პროცესი გრძელდება. გარკვეული შედეგები უკვე მიღწეულია, რაც ნიშნავს სტრუქტურულ და შინაარსობრივ რეფორმებს“ -განაცხადა გიორგი გახარიამ.

საქართველოს პარლამენტში მთავრობის მეთაურს უსმენენ. პრემიერის მოსმენით დღეს, პარლამენტში საგაზაფხულო სესია დასრულდება. რეგლამენტის შესაბამისად, თვის ბოლო პარასკევს, სესია იხურება.