ირაკლი ღარიბაშვილი: უკვე წლებია, საქართველოს თავდაცვის ძალების განვითარებაში აშშ ათეულობით მილიონ დოლარს ხარჯავს

საქართველოს დამოუკიდებლობის აღდგენის დღიდან აშშ-მა ქვეყნის განვითარებისთვის 4 მილიარდ დოლარზე მეტი დახარჯა, საგარეო თავდაცვის ფონდის ფარგლებში, აშშ, უკვე წლებია, ათეულობით მილიონ დოლარს ხარჯავს საქართველოს თავდაცვის ძალების განვითარებაში, - ამის შესახებ საქართველოს თავდაცვის მინისტრმა, ირაკლი ღარიბაშვილმა „ღირსეული პარტნიორი 2020“-ის გახსნის ცერემონიაზე განაცხადა.

„ამერიკელი სამხედრო ინსტრუქტორების ხელმძღვანელობით, წარმატებით მიმდინარეობს საქართველოს თავდაცვის მზადყოფნის პროგრამა. ჩვენი საერო მიზანია, განვავითაროთ თანამედროვე, ბრძოლისუნარიანი და ნატო-სთან თავსებადი თავდაცვის ძალები, რომლებიც ეროვნული თავდაცვის ამოცანების შესრულებასთან ერთად, მნიშვნელოვან წვლილს შეიტანს რეგიონული და გლობალური უსაფრთხოების განმტკიცებაში. ღირსეული პარტნიორობა, რომელიც ჩვენმა ჯარისკაცებმა საერთაშორისო მისიებში უდიდესი კონტრიბუციითა და მრავალეროვნულ სწავლებებში გამოჩენილი პროფესიონალიზმით დაამტკიცეს სწორედ ამ პროცესის ერთ-ერთი შემადგენელი ნაწილი და საფუძველია. მინდა, კიდევ ერთხელ მადლობა ვუთხრა თითოეულ სამხედრო მომსახურეს, ჩვენს გმირ ჯარისკაცებს, ვუსურვო მათ წარმატება დასახული ამოცანების შესრულებაში“, – განაცხადა ირაკლი ღარიბაშვილმა.

„ღირსეული პარტნიორი 2020“ ოფიციალურად გაიხსნა. სწავლების ოფიციალური გახსნისთვის, საქართველოში საჰაერო გზით ეტაპობრივად უკვე ჩამოვიდა მონაწილე ქვეყნების პირადი შემადგენლობა, ხოლო საზღვაო გზით ფოთის პორტში ამერიკული სამხედრო ტექნიკით დატვირთული გემი. „ღირსეული პარტნიორი 2020“, რომელსაც საქართველო წელს მეხუთედ მასპინძლობს, 18 სექტემბრის ჩათვლით ჩატარდება. წელს სწავლებაში საქართველო ნატოს წევრ ოთხ ქვეყანასთან ერთად მონაწილეობს. სწავლების მიზანია საქართველოს, ამერიკისა და პარტნიორ ქვეყნებს შორის მზადყოფნისა და თავსებადობის გაუმჯობესება, შავი ზღვის რეგიონში სტაბილური და უსაფრთხო გარემოს შენარჩუნებაში წვლილის შეტანა.