რამდენიმე სკოლის დაწყებითი კლასის მოსწავლეები კომპიუტერულ მეცნიერებას ისწავლიან

სექტემბრიდან დაწყებითი კლასის მოსწავლეები საქართველოში წიგნით „გამარჯობა, რუბი“ პროგრამირებას და კომპიუტერულ მეცნიერებას ისწავლიან.

„თავგადასავალი პროგრამირების სამყაროში“ და „მოგზაურობა კომპიუტერში“ სახელმძღვანელოდ სამ საჯარო და ორ კერძო სკოლაში შევა. ლაპარაკია თბილისის 71-ე, რუსთავის მე-4, საგარეჯოს მე-2 საჯარო სკოლებზე, ასევე “ბაქსვუდისა“ და „21-ე საუკუნე“ კერძო საგანმანათლებლო დაწესებულებებზე, სადაც სწავლება კლუბების სახით დაინერგება. 

პროგრამის ფარგლებში 60 მასწავლებელსა და ტრენერს სერტიფიცირებული სემინარი და ვორკშოპი ფინელმა პროგრამისტმა ლინდა ლიუკასმა ჩაუტარა. სპეციალისტი საქართველოში კომუნიკაციების ეროვნულმა კომისიამ ჩამოიყვანა. წიგნი „გამარჯობა რუბი“ მსოფლიოს 25 ქვეყანაშია აღიარებული. 

ჟურნალმა Forbes-მა 2018 წელს ტექნოლოგიების სფეროში მოღვაწე ევროპის საუკეთესო 50 ქალს შორის ლინდა ლიუკასი დაასახელა. ევროკომისიამ კი 33 წლის ქალს ფინეთის ციფრული ჩემპიონი უწოდა.