ამერიკელი მეცნიერები აივ ინფექციის მკურნალობის ახალ მეთოდზე ალაპარაკდნენ

ამერიკელმა მეცნიერებმა აივ ინფექციის სამკურნალო კომპლექსური იმუნოთერაპიული მიდგომა შეიმუშავეს, რომელიც საშუალებას იძლევა არა მხოლოდ მიაგნოს პაციენტის ორგანიზმში დამალულ ვირუსს, არამედ სამუდამოდ გაანადგუროს ის. ეს კი აივ ინფექციის წინააღმდეგ ვაქცინის შესაქმნელად წინგადადგმული ნაბიჯია.

პიტსბურგის უნივერსიტეტის მეცნიერების მიერ ჩატარებული ექსპერიმენტის შედეგები აპრილის დასაწყისში სამედიცინო ჟურნალში EBioMedicine გამოქვეყნდა.

ამ მეთოდით მკურნალობის საკვანძო მომენტი იმუნური უჯრედები გახდა, რომელიც შექმნილია სრულიად განსხვავებული ვირუსის - ციტომეგალოვირუსის ამოცნობის მიზნით.

ის, რომ ამ ეტაპზე შეუძლებელია იმუნოდეფიციტის ვირუსის სრულად მოშორება, დაკავშირებულია ინფექციის მაღალ მუტაგენურობასთან, რომელსაც შეუძლია უმოქმედო, ლატენტურ ფორმაში გადავიდეს. როდესაც ეს ხდება, ვირუსი იმუნური უჯრედების დნმ-ში შედის - ე.წ. T ჰელპერებში - და იქ რჩება სამუდამოდ იქამდე, სანამ პაციენტი ანტირეტროვირუსულ მედიკამენტებს იღებს. 

სპეციალისტებმა კი გადაწყვიტეს, რომ შეესწავლათ სხვა ვირუსის ქცევა, რომელსაც ასევე შეუძლია ლატენტურ ფორმაში გადასვლა. საუბარია ციტომეგალოვირუსზე, რომელსაც თვალის დაავადებებისა და სხვა მძიმე დაავადებების გამოწვევა შეუძლია, თუმცა იმუნური სისტემის მიერ მისი გაკონტროლება ადვილად ხდება. ამ ინფექციის მატარებელი პლანეტის ზრდასრული მოსახლეობის თითქმის 50%-ია, ხოლო აივ ინფექციით დაავადებულებში ეს მაჩვენებელი 95%-ს უტოლდება. 

სპეციალისტთა მონაცემების მიხედვით, ზოგიერთი ადამიანის "T ჰელპერების" 20%-ს შეუძლია ციტომეგალოვირუსის მიგნება. მეცნიერების აზრით, სწორედ ამ სპეციფიურ ციტომეგალოვირუსის იმუნურ უჯრედებშია შესაძლებელი აივ ინფექციის "დამალვა". სპეციალისტების თქმით, ისინი შეეცადნენ, შეექმნათ იმუნოთერაპია, რომელიც არა მხოლოდ აივ ინფექციაზე იქნებოდა ორიენტირებული, არამედ გაააქტიურებდა T- დამხმარე უჯრედებს, რომლებსაც ციტომეგალოვირუსის გამოვლენის უნარი აქვთ.