ცნობილია ქვეყნები, სადაც ყველაზე ხშირად განიცდიან ნეგატიურ ემოციებს

აფრიკული ქვეყანა ჩადი „გელაპის კვლევითი ინსტიტუტის“ კვლევის სათავეში მოხვდა როგორც ქვეყანა, რომელმაც 2018 წელს ძირითადად ნეგატიური ემოციები განიცადა. „ყველაზე უბედური ქვეყნების“ ათეულში 7 აფრიკული ქვეყანა მოხვდა. 

სოციოლოგებმა 143 ქვეყნიდან 151 ათასი ადამიანი გამოკითხეს. მათ ეკითხებოდნენ ემოციებსა და შთაბეჭდილებებზე, რომლებიც განიცადეს წინა დღეს. კერძოდ, იცინოდნენ თუ არა, უხაროდათ თუ არა, გაიგეს თუ არა რამე ახალი და საინტერესო. ძირითადი პასუხები ეხებოდა ნეგატიურ ემოციას - ტკივილი, შფოთვა, სევდა, სტრესი, ბრაზი.

ნეგატიური ემოციების გლობალური დონე მსოფლიოში გასული წლის მსგავსად იგივე დარჩა (30%); სტრესის დონე შემცირდა 35%-მდე, ამასთან, რეკორდულად გაიზარდა იმ ადამიანების რაოდენობა, რომლებიც მწუხარებას განიცდიდნენ (24%), ასევე შიშსა და ბრაზს (22%). 

ნეგატიური ემოციის რეიტინგში ჩადი პირველ ადგილზე ლტოლვილების დიდი რაოდენობის და ქვეყანაში ინფრასტრუქტურის დანგრევის გამო მოხვდა. ამ სიაში ხვდება ნიგერი, სიერა-ლეონე, ერაყი, ირანი, ბენინი, ლიბერია, გვინეა, პალესტინის ტერიტორიები და კონგო.

დადებითი ემოციების რეიტინგში სამხრეთ და ცენტრალური ამერიკის ქვეყნები ლიდერობენ. ესენია პარაგვაი, პანამა, გვატემალა, მექსიკა. სალვადორი, ინდონეზია, ჰონდურასი, ეკვადორი, კოსტა-რიკა.