Reuters: აშშ მთვარის რესურსების მოპოვების შესახებ საერთაშორისო შეთანხმებას რუსეთის მონაწილეობის გარეშე ამზადებს

აშშ-ის პრეზიდენტის, დონალდ ტრამპის ადმინისტრაცია მთვარეზე რესურსების მოპოვების საერთაშორისო შეთანხმების პროექტზე მუშაობს. ამის შესახებ Reuters-ი თეთრ სახლში საკუთარ წყაროზე დაყრდნობით იტყობინება.

გამოცემის ინფორმაციით, დოკუმენტს „არტემიდას შეთანხმება“ ჰქვია და ის მთვარეზე წიაღის მოპოვების ბაზების ირგვლივ ე.წ. უსაფრთხოების ზონების შექმნას ითვალისწინებს, რათა სხვა სახელმწიფოების და კომპანიების მხრიდან ჩარევა გამოირიცხოს.

„ეს არ არის რაღაც ტერიტორიული პრეტენზიები. „უსაფრთხოების ზონები“ კოსმოსის ათვისებაში მონაწილე სახელმწიფოების ქმედებების კოორდინირების საშუალებას მოგვცემს გარკვეული ტერიტორიების სუვერენულად გამოცხადების გარეშე“, - ამბობს გამოცემის ერთ-ერთი წყარო.

ამასთან, შეთანხმება სამართლებლივ ბაზას შექმნის, რომელიც კომპანიებს მთვარეზე მოპოვებული რესურსების საკუთრების უფლებას შეუნარჩუნებს. უახლოეს დღეებში აშშ შეთანხმებას პარტნიორ სახელმწიფოებს წარუდგენს: კანადას, იაპონიას, არაბთა გაერთიანებული საამიროებს და ევროპულ ქვეყნებს. პირველ ეტაპზე ვაშინგტონი პარტნიორთა სიაში რუსეთს არ ჩართავს, რადგან პენტაგონი დედამიწის ორბიტაზე რუსული თანამგზავრების მხრიდან ამერიკული სატელიტების მიმართ სახიფათო მანევრებით არის შეშფოთებული.

აპრილის დასაწყისში ტრამპმა ხელი მოაწერა ბრძანებას იმის შესახებ, რომ ამერიკელებს კოსმოსის ათვისების და მთვარეზე რესურსების მოპოვების უფლება აქვთ. რუსეთში ამ ნაბიჯს სხვა პლანეტების ტერიტორიების აგრესიული მითვისების გეგმა უწოდეს.

ამ მომენტისთვის მთვარის იურიდიული სტატუსი და მისი რესურსების გამოყენების შესაძლებლობა ბოლომდე არ არის გარკვეული. 1967 წლის ხელშეკრულება დედამიწის თანამგზავრზე შეიარაღების განთავსებას და მის რომელიმე ტერიტორიაზე სუვერენიტეტის გამოცხადება. დოკუმენტი მთვარის რესურსების გამოყენებას არ არეგულირებს. ასევე, 1979 წელს გაფორმდა შეთანხმება მთვარეზე სახელმწიფოების მოღვაწეობის შესახებ, რომლის მიხედვითაც ყველა ქვეყანას ციური სხეულების შესწავლის თანაბარი უფლება აქვს, თუმცა მას მხოლოდ 18-მა სახელმწიფომ მოაწერა ხელი. მათ შორის არც აშშ და არც რუსეთია.