„ვოიაჯერ 2“-მა დედამიწასთან კონტაქტი მცდარი ბრძანების გამო დაკარგა. NASA კავშირის აღდგენაზე მუშაობს

აშშ-ის აერონავტიკისა და კოსმოსური სივრცის კვლევის ეროვნულმა სამმართველომ (NASA) ზონდ „ვოიაჯერ 2“-თან კავშირის დაკარგვის შესახებ განაცხადა. ამის შესახებ BBC წერს.

გამოცემის ინფორმაციით, ზონდს, რომელიც დედამიწიდან 19,9 მილიარდი კილომეტრის მანძილზე მიფრინავს, 21 ივლისს შეცდომით არასწორი ბრძანებას გასცეს. ამან დედამიწისკენ მომართული ანტენის ღერძის 2 გრადუსით გადახრა გამოიწვია, რის შემდეგაც ზონდი დედამიწიდან ბრძანებებს ვეღარ იღებს და პლანეტაზე ინფორმაციას ვერ აგზავნის. თუმცა, შემდეგ სპეციალისტებმა აპარატის საკონტროლო სიგნალი დაიჭირეს, რის გამოც კონტაქტის აღდგენის იმედი გაუჩნდათ. პრობლემის მოგვარებაზე სპეციალისტების ჯგუფი მუშაობს.

NASA-ში ასევე განმარტავენ, რომ კავშირი შესაძლოა ავტომატურადაც აღდგეს - ორიენტირების სისტემების ავტომატური გადატვირთვის შემდეგ, რომელიც ოქტომბერში უნდა განხორციელდეს.

„ვოიაჯერი 2“ და მისი „ტყუპისცალი“ „ვოიაჯერი 1“ ერთადერთი კოსმოსური აპარატები არიან, რომლებმაც ვარსკვლავთაშორისო სივრცეს მიაღწიეს - 2018 და 2012 წლებში. „ვოიაჯერი 2“ ერთადერთი კოსმოსური ხომალდია, რომელმაც ნეპტუნსა და ურანთან გაიფრინა, „ვოიაჯერი 1“ კი, რომელიც დედამიწიდან 24 მილიარდი კილომეტრის მანძილზე იმყოფება, კაცობრიობის ყველაზე შორეული კოსმოსური ხომალდია.