The Guardian: რამდენიმე ქვეყანაში გამოცადეს კიბოს საწინააღმდეგო ვაქცინა, რომელმაც ზოგ შემთხვევაში სიმსივნეები სრულად გაანადგურა

მსოფლიოს 11 ქვეყანაში კიბოს საწინააღმდეგო ვაქცინის, „ამივანტამაბის“ (Amivantamab) კვლევა ჩატარდა. პრეპარატმა 15 პაციენტს სიმსივნე სრულიად გაუქრო.

The Guardian-ის ცნობით, ვაქცინა თავისა და კისრის სიმსივნის მქონე 102 პაციენტს გაუკეთეს - მათი დაავადება მკურნალობის სხვა მეთოდებს უკვე ვერ ექვემდებარებოდა. 43 ადამიანს სიმსივნე გაუქრა ან შეუმცირდა, მათ შორის 28-ს საგრძნობლად შეუმცირდა, 15 -ს კი სრულად გაუქრა. ანალოგიური შედეგები აჩვენა პრეპარატმა ფილტვის კიბოს მქონე პაციენტებშიც.

ლონდონის კიბოს კვლევის ინსტიტუტის პროფესორმა, კევინ ჰარინგტონმა განაცხადა, რომ ეს „უპრეცედენტოდ ძლიერი რეაქციაა“ იმ პაციენტებში, რომელთა დაავადებაც რეზისტენტული გახდა ქიმიოთერაპიისა და იმუნოთერაპიის მიმართ.

„ამ მკურნალობას პოტენციურად შეუძლია ყოველწლიურად ათასობით პაციენტს მოუტანოს სარგებელი“, - დასძინა მან.

პაციენტებმა, რომლებმაც ვაქცინა მიიღეს, მკურნალობის დაწყებიდან საშუალოდ 12,5 თვე იცოცხლეს, მიუხედავად დიაგნოზის გამო არსებული ცუდი პროგნოზისა. ICR-ის აღმასრულებელმა დირექტორმა, კრისტიან ჰელინმა აღნიშნა, რომ ეს კვლევა აჩვენებს, თუ როგორ შეიძლება მკურნალობის ახალი მეთოდების შემუშავებამ „მნიშვნელოვან წარმატებებამდე“ მიგვიყვანოს.

„ამივანტამაბი“ კიბოზე სამი გზით მოქმედებს. ის ბლოკავს ზრდის ეპიდერმული ფაქტორის რეცეპტორს (EGFR) - პროტეინს, რომელიც ხელს უწყობს სიმსივნის ზრდას და იმ სასიგნალო გზას (MET), რომელსაც კიბოს უჯრედები ხშირად იყენებენ მკურნალობისგან თავის დასაღწევად. ამასთანავე, პრეპარატი ეხმარება იმუნური სისტემის გააქტიურებაში სიმსივნესთან საბრძოლველად.

ამ ეტაპზე ვაქცინა თითქმის 60 კლინიკურ კვლევაში გადის შეფასებას. ძირითადად მას ფილტვის, კოლორექტული, ტვინისა და კუჭის კიბოს სამკურნალოდ ტესტავენ. პრეპარატი კანქვეშ შეჰყავთ ინიექციის სახით და არა ვენიდან, რაც თერაპიას ბევრად სწრაფსა და კომფორტულს ხდის.