ამერიკაში იპოვეს კომპანია, რომელიც ტვიტერზე მილიონობით ყალბი ფოლოუერით ვაჭრობდა

27 იანვარს, The New York Times-მა გამოაქვეყნა გამოძიება კომპანია Devumi-ს შესახებ, რომელიც დაკავებულია იმით, რომ ნებისმიერ მსურველს მიჰყიდის Twitter-ზე ყალბ ფოლოუერებს, ასევე გაუზრდის მომხმარებელს YouTube-ზე ნახვების, Soundcloud-ზე მოსმენების და LinkedIn-ზე პროფილის ნახვების რაოდენობას. გამოცემის შეფასებით, კომპანია იყენებს სულ ცოტა 3,5 მილიონ ყალბ ექაუნთს. მაგალითად, მასალის მომზადების დროს თავად The New York Times-ის წარმომადგენლებმა კომპანიისგან 25 ათასი ფოლოუერი 225 დოლარად იყიდეს.

გამოცემის ინფორმაციით, ფოლოუერების ყიდვაში ეკონომიკური ინტერესი შეიძლება იყოს, რადგან ბაზარზე პოპულარულ ბლოგერებს, რომლებიც რეკლამით ფულს შოულობენ, 100 ათას ფოლოუერზე მეტი თუ ჰყავთ სარეკლამო ტვიტში საშუალოდ 2 ათას დოლარს გამოიმუშავებენ, ხოლო თუ ფოლოუერი მილიონია, თანხა 20 ათას დოლარამდე იზრდება.

Devumi-ს მიერ გაყიდული ყალბი ექაუნთების უმრავლესობის სახელები მოგონილია, მაგრამ ზოგჯერ ბოტები რეალური ადამიანების იდენტობასაც იყენებენ და მხოლოდ ოდნავ ცვლიან ექაუნთების სახელებს და ფოტოებს.

ჟურნალისტების ხელთ არსებული დოკუმენტების თანახმად, Devumi-ს 200 ათასზე მეტი კლინტი ჰყავს, მათ შორის ცნობილი ადამიანები - ტელეწამყვანები, სერიალების მსახიობები, სპორტსმენები, მუსიკოსები და სხვ. მათგან ზოგიერთმა განაცხადა, რომ "ყველა ასე აკეთებს", სხვებმა თქვეს, რომ ფოლოუერები "ექსპერიმენტისთვის" შეიძინეს, ხოლო ნაწილმა განაცხადა, რომ არაფერი იციან და ეს თანაშემწეებმა მათი თანხმობის გარეშე გააკეთეს.

ყალბი ფოლოუერების მყიდველები აღმოჩდნენ, აშშ-ის ჯანდაცვის მინისტრის ცოლი, ეკვადორის პრეზიდენტის მრჩეველი ლენინ მორენო, ჩინეთის სახელმწიფო საინფორმაციო სააგენტოს რედაქტორი, ასევე კომპანია HelloSociety და Twitter-ის დირექტორთა საბჭოს წევრი მარტა ლეინ ფოქსიც კი.    

Devumi ბიზნესმენმა ჰერმან კალასმა დააფუძნა. თავის ვებგვერდზე კომპანიას მითითებული აქვს არასწორი მისამართი, ასევე არასწორია ცნობები კალასის რეზიუმეში, რომელშიც წერია, რომ ბიზნესმენმა თითქოს პრინსტონის და მასაჩუსეტსის უნივერსიტეტები დაამთავრა. ეს ცნობა გაზეთს არცერთმა უნივერსიტეტმა არ დაუდასტურა. 2017 წელს კალასმა თავის თანამშრომელს სასამართლოში უჩივლა, რომელმაც მსგავსი სახელწოდების კომპანია დაარსა და კალასის კომპანიისთვის კლიენტების წართმევას შეეცადა. სასამართლოს დოკუმენტებიდან გაირკვა, რომ Devumi ყალბ ექაუნთებს თავად არ ქმნის, არამედ ბითუმად ყიდულობს ექაუნთებს სხვა ფირმებისგან. ერთ-ერთ ვებგვერდზე, რომელიც ასეთ მომსახურებას ყიდის, 1000 ტვიტერ-ბოტი დოლარზე ოდნავ მეტი ღირს, Devumi კი მათ 17 დოლარად ყიდის.

კალასი თავდაპირველად The New York Times-ს ინტერვიუზე დათანხმდა და განაცხადა, რომ არანაირი ყალბი ფოლოუერებით არ ვაჭრობს, მაგრამ როდესაც მას ჟურნალისტებმა 10 ყალბი ექაუნთის სახელი გაუზგავნეს, ბიზნესმენმა შეტყობინებებს აღარ უპასუხა.

Twitter-ის წარმომადგენლებმა ჟურნალისტებს უთხრეს რომ კომპანია არ აანალიზებს თითოეული ექაუნთის ნამდვილობას, მაგრამ საჩივრის შემთხვევაში მსგავსი პროფილები უმალ იბლოკება. კომპანიამ ასევე განაცხადა, რომ აგრესიულად ებრძვის სპამს ქსელში და ყოველკვირეულად საშუალოდ 6,4 მილიონ საეჭვო ექაუნთს შლის.

გამოძიების გამოქვეყნების შემდეგ თემამ პოლიტიკოსების ყურადღება მიიპყრო. რამდენიმე სენატორმა ამერიკის სავაჭრო კომისიას Devumi-ს და მისი მსგავსი კომპანიების პრაქტიკის შესწავლისკენ მოუწოდა. Devumi-ს წინააღმდეგ გამოძიება ფლორიდის შტატის პროკურატურამაც დაიწყო. პუბლიკაციის გამოქვეყნების შემდეგ ბევრი ყალბი ექაუნთი, რომლითაც Devumi ვაჭრობდა, ტვიტერიდან გაქრა, ჟურნალისტების შეფასებით - უკვე მილიონზე მეტი ასეთი ექაუნთი ქსელში აღარ არის.