როგორ დავიცვათ ბავშვები ზაფხულის ინფექციებისაგან

ზაფხულობით ბავშვები ხშირად ავადდებიან ინფექციური ვირუსებით. ლაპარაკია ძირითადად ინფექციებზე, რომლებსაც იწვევს ზოგიერთი ენტეროვირუსი (მაგალითად, კოკსაკის ვირუსი, ექოვირუსი, და თავად ენტეროვირუსი) და ადენოვირუსი. ასეთი დაავადებები წელიწადის სხვა დროსაც გვხვდება, მაგრამ იშვიათად.

ადენოვირუსული ინფექციის აფეთქება ხდება ხოლმე საბავშვო ბანაკებში, კოკსაკის ვირუსი - გავრცელებულია კურორტებზე.

როგორ ამოვიცნოთ ეს ინფექციები. ერთი მხრივ ეს დაავადებები შეიძლება სხვადასხვაგვარად გამოვლინდეს, მაგრამ მათ საერთოც აქვთ - მომატებული ტემპერატურა. მაგალითად, ენტეროვირუსულ ინფექციებში (კერძოდ, დაავადება „ხელი-ფეხი-პირი“ (Hand-Foot-and-Mouth) და ჰერპანგინა) სიცხე შეიძლება ერთადერთი სიმპტომი იყოს. სხვა სიმპტომები ჩვეულებრივ ასეთია:

- გამონაყარი კანზე ან ლორწოვანზე. დაავადების „ხელი-ფეხი-პირი“-ს დროს სახელწოდებაში ჩამოთვლილ ყველა მონაკვეთზე ჩნდება წითელი ლაქები ცენტრში ბუშტებით. ჰერპანგინის დროს პირში ჩნდება აფტები - მცირე გამონაყარი შემოსაზღვრული წითელი კანტით. ეს ყველაფერი ხშირად საკმაოდ მტკივნეულია. პარექოვირუსები და ექოვირუსები იწვევს ასევე გამონაყარს, რომელიც სხვადასხვა სახისა, რაშიც ექიმის გარეშე გარკვევა რთული იქნება.

- მწვავე რესპირატორული ვირუსული ინფექცია. თითქმის ყველა ზემოაღნიშნული ვირუსი იწვევს მწვავე რესპირატორულ ვირუსულ ინფექციას, და ასეთი სიმპტომები ზაფხულში, დიდი ალბათობით, მათგან წარმოიქმნება.

როდის უნდა მივმართოთ ექიმს. ტრადიციულად მხოლოდ გართულების შემთხვევაში. ხშირად დაავადება რამდენიმე დღეში თავად გადის, უბრალოდ საჭიროა პაციენტმა საკმარისი სითხე მიიღოს და თუ სიცხე მაღალია და ბავშვი თავს ცუდად გრძნობს - სიცხისდამწევები/ტკივილგამაყუჩებლები (გარდა ასპირინისა, რომლის მიღებაც ბავშვებისათვის არ შეიძლება). ანტიბიოტიკები ვირუსების წინააღმდეგ არ მუშაობს, ასეთ სიტუაციაში ვირუსის საწინააღმდეგო სასარგებლო პრეპარატები, ჯერჯერობით ფაქტობრივად არ არსებობს. თუ თქვენ მაინც მიმართავთ ექიმს, ის დიდი ალბათობით, არანაირ კვლევას არ დაგინიშნავთ: დიაგნოზისათვის საკმარისია მარტივი დათვალიერება და საუბარი.

მაგრამ არსებობს სიტუაციები, როდესაც სპეციალისტისთვის მიმართვა აუცილებელია. მაგალითად, თუ პაციენტს ყელი სტკივა ან მაღალი სიცხე აქვს ექიმმა უნდა გამორიცხოს ბაქტერიული ინფექცია. ასევე აუცილებელია საავადმყოფოში მისვლა თუ გამონაყარს შუშის ჭიქის ზედაპირს აჭერთ და ის არ ფერმკთალდება. ექიმის დახმარება საჭიროა ასევე, თუ:

- მდგომარეობა სულ უფრო უარესდება;   
- ბავშვს აქვს გაუწყლოვნება (ცოტას შარდავს, უცრემლოდ ტირის); 
- ბავშვს უჭირს სუნთქვა;
- გამონაყართან შეხება სტკივა და ის უჩირქდება;
- კისერი უშეშდება, სტკივა თავი.

ასეთი ვირუსებით არამხოლოდ ბავშვი, არამედ ნებისმიერი ასაკის ადამიანი შეიძლება დაავადდეს.

როგორ დავიცვათ საკუთარი თავი და ბავშვები ვირუსებისაგან. პროფილაქტიკის სპეციფიკური ზომები არ არსებობს, ამიტომ მნიშვნელოვანია ჰიგიენის ტრადიციული წესების დაცვა.

ენტეროვირუსები გადამდებია პაციენტთან მჭიდრო კონტაქტის დროს. მაგალითად, თუ თქვენ რაიმენაირად (პირდაპირ ან დაბინძურებული კარის სახელურის გზით) შეეხეთ ადამიანის გამონაყოფს, მაგალითად ნერწყვს, და შემდეგ - თვალებს, ცხვირს ან პირს. ბევრი ადენოვირუსი გადამდებია ჰაერ-წვეთოვანი გზით. ამიტომ:

- სწორად დაიბანეთ ხელი, ანუ საკმაოდ დიდხანს, ხარისხიანად და ყველა ისეთი შემთხვევის შემდეგ, თუ მასზე სახიფათო ვირუსი მოხვდა;
- შეეცადეთ მინიმალურად ეკონტაქტოთ დაავადებულ ადამიანს ან სულ ცოტა ასწავლეთ მას სწორად ხველება და დაცემინება (საჭიროა ქაღალდის ცხვირსახოცით ცხვირის და პირის დაფარვა და ისე დაცემინება და ამ ცხვირსახოცის უმალ გადაგდება. თუ ცხვირსახოცი არ არის, საჭიროა დაცემინების და დახველების დროს ცხვირის და პირის ხელის იდაყვით დაფარვა. წინააღმდეგ შემთხვევაში ვირუსიანი გამონაყოფი ყველა მხარეს მიმოიფრქვევა).

ზემოხსენებული ვირუსების წინააღმდეგ ვაქცინები მხოლოდ ჩინეთშია. ადენოვირუსის წინააღმდეგ აცრაც არ შეიძლება, როგორც პარექოვირუსისაგან.

მიჩნეულია, რომ დაავადებული ადამიანი ყველაზე მეტად სახიფათოა გარშემომყოფთათვის სიმპტომების გამოვლინების პირველ კვირაში. სპეციალისტებს მიაჩნიათ, რომ ბავშვის წაყვანა საბავშვო ბაღში და სკოლაში მას შემდეგ შეიძლება, რაც ტემპერატურა ნორმალურ მაჩვენებელს დაუბრუნდება, უკეთ იგრძნობს თავს და გაუმჯობესდება კანის მდგომარეობა, თუ გამონაყარი ჰქონდა.