მეცნიერები სექსიზმის და რასიზმის შესახებ ყალბ კვლევებს ცრუ მეცნიერების გამოსააშკარავებლად ავრცელებდნენ

დასავლეთის სამეცნიერო სამყარო მასშტაბურ სკანდალში გაეხვია. სამმა ცნობილმა მეცნიერმა აღიარა, რომ თითქმის მთელი წლის განმავლობაში საკმაოდ არაეთიკურ სოციალურ ექსპერიმენტს ატარებდა.

ისინი შეგნებულად წერდნენ უაზრო და ღიად აბსურდულ სამეცნიერო სტატიებს, რომლებიც სხვადასხვა სოციალურ სფეროს ეხებოდა, რათა დაემტკიცებინათ, რომ ამ სფეროში იდეოლოგია საღ აზრზე ძლიერია.  

ნაშრომებს გამოგონილი სახელებით წერდნენ და როგორც მეცნიერები ელოდნენ, სტატია წარმატებით გადიოდა რედაქტირებას და ავტორებს სარეცენზიო სამეცნიერო ჟურნალები პატივისცემით ეპყრობოდნენ. მაგალითად, ერთ-ერთ სტატიაში ისინი ამტკიცებდნენ, რომ პარკში ძაღლების სექსი გაუპატიურებად უნდა განეხილათ. ამ ცრუ კვლევისთვის მათ სპეციალური პრიზიც მიიღეს. 

მეცნიერების მთავარი მიზანი ჭეშმარიტების დადგენაა, თუმცა სოციალური კვლევების კუთხით, სიმართლე უკვე აღარავის აინტერესებს, - აცხადებენ ჯეიმ ლინდსი, ჰელენ პლაკროუზი და პიტერ ბოგოსიანი. მათი თქმით, დღევანდელ სამეცნიერო სტატიებში მთავარია ტექსტი იდეოლოგიურ ნორმებს აკმაყოფილებდეს, ანუ „გამოხატო მხარდაჭერა წარსულში დაჩაგრულების მიმართ“.

მეცნიერების ღია წერილი ჟურნალ Areo-ში გამოქვეყნდა.

2017 წლის აგვისტოდან, ლინდსი, ბოგოსიანი და პლაკროუზი მოგონილი სახელებით ცნობილ სამეცნიერო ჟურნალებს სტატიებს უგზავნიდნენ. სტატიები ძირითადად მოიცავდა ფემინიზმის კვლევას, ვაჟკაცობის კულტურას, რასობრივი იდენტიფიკაციის თემას, სექსუალურ ორიენტაციას და სხვ. თითოეულ სტატიაში წამოჭრილი იყო რაიმე რადიკალურ-სკეპტიკური თეორია, რომელიც გმობდა ამა თუ იმ „სოციალურ კონსტრუქციას“ (მაგალითად, გენდერული როლები). ამასთან, თვითონ ნაშრომები აბსურდული იყო. ავტორები სპეციალურად წერდნენ მას იუმორისტულად, რომ რედაქტორებს სტატიის სერიოზულობაში ეჭვი შეჰპარვოდათ.  

მაგრამ სამეცნიერო თვალსაზრისით, სტატიებს არავინ აკრიტიკებდა. მათი დასკვნები არ იყო გამყარებული რეალური ციფრებით; ავტორები ხანდახან არარსებულ წყაროებს ეყრდნობოდნენ, მაგრამ არც ამას ამოწმებდა ვინმე.

მაგალითად, ერთ-ერთ ნაშრომში მეცნიერები მკითხველს ურჩევდნენ, რომ კაცებს ძაღლებივით ვარჯიში სჭირდებათ. კიდევ ერთ პუბლიკაციაში მკვლევრები თეთრკანიან სტუდენტებს ურჩევდნენ ლექციებისთვის იატაკზე მსხდომებს და ხელებშეკრულებს ესმინათ, რადგან ამით „თეთრი ადამიანების მიერ ჩადენილ დანაშაულს უფრო გაისიგრძეგანებდნენ“; მესამე სტატიაში სიმსუქნეს, რომელიც ადამიანის ჯანმრთელობას ვნებს, ახალისებდნენ და წერდნენ, რომ ეს თავისუფალი ადამიანის არჩევანია. 

სამეცნიერო სკანდალი ჯერ კიდევ არ ჩამცხრალა. ყალბი კვლევების ავტორებს კრიტიკოსებთან ერთად მხარდამჭერებიც გამოუჩნდნენ. ხოლო ვებგვერდებებმა, რომლებიც მათ სტატიებს აქვეყნებდნენ, ცრუ კვლევები წაშალეს, თუმცა კომენტარი არ გაუკეთებიათ.