შს მინისტრმა მუხტარლის საქმის გამოძიების შუალედური დასკვნა წარმოადგინა

შინაგან საქმეთა მინისტრმა აფგან მუხტარლის საქმეზე განცხადება გააკეთა. მან წარმოადგინა შუალედური ინფორმაცია მუხტარლის საქმეზე. გიორგი მღებრიშვილის თქმით, 30 მაისს აფგან მუხტარლის მეუღლის ლეილა მუსტაფაევას განცხადების საფუძველზე დაიწყო გამოძიება მუხტარლის თავისუფლების უკანონო აღკვეთის ფაქტზე. ამ საქმეზე გატარდა საგამოძიებო მოქმედებები. კერძოდ, ამოღებულია სათვალთვალო კამერის მასალები.

„ნიკოლოზ ბარათაშვილის 2 ნომერში სახელმწიფო ელექტროსისტემის ობიექტის ვიდეოჩანაწერში ფიქსირდება, რომ პიროვნება თეთრ მაისურში - სავარაუდოდ, აფგან მუხტარლი - ნომერ 4 სამარშრუტო მიკროავტობუსში ჯდება. ამ სამარშრუტო ხაზის ყველა მძღოლი და მგზავრები გამოიკითხნენ, რომლებმაც აღნიშნეს, რომ საეჭვო არაფერი შეუნიშნავთ. ამ მიდამოებში გამოიკითხნენ გარე მოვაჭრეები, ტაქსის მძღოლები, დაცვის სამსახურის თანამშრომლები, რომლებმა განმარტეს, რომ 29 მაისს არ დაუნახავთ ვინმეს მიმართ ფიზიკური შეურაცხყოფის ან ძალადობის ფაქტი. ამასთან, 4 ობიქეტიდან ამოღებული მასალიდან, რომელიც მუხტარლის სახლის მიდამოებში მდებარეობს, მოცემულ პერიოდებში აფგან მუხტარლი არ ფიქსირდება“, - განაცხადა მინისტრმა.

მისივე თქმით, გამოძიების მიერ აზერბაიჯანის შესაბამის ორგანოებს სამართლებრივი დახმარების აღმოჩენის მიზნით დაეგზავნათ შუამდგომლობა მათ წარმოებაში არსებული სისხლის სამართლის საქმის მასალების გამოთხოვისა და აფგან მუხტარლის დეტალური დაკითხვის თაობაზე, ასევე ეთხოვათ დაკითხვის დროს ქართული მხარის დასწრების შესახებ.

”აფგან მუხტარლის და ლეილა მუსტაფაევას ადვოკატი გაეცნო სისხლის სამართლის საქმის მასალებს და მას მიეცა ამოღებული ვიდეოჩანაწერების დათვალიერების საშუალება”, - განაცხადა მღებრიშვილმა.

მისივე თქმით, ამ საქმეზე სასაზღვრო სამსახური თანამშრომლებიც გამოკითხნენ, რომლებმაც განაცხადეს, რომ 29 მაისს, ლაგოდეხის სასაზღვრო-გამშვებ პუნქტში, დედოფლისწყაროსა და სიღნაღში არსებულ სასაზღვრო ზოლში, რაიმე სახის ინციდენტს ადგილი არ ჰქონია. მღებრიშვილის განცხადებით, საქმეზე 343 მოწმე დაიკითხა.

„სასამართლო განჩინებით შპს „მაგთიკომიდან“ გამოძიებამ გამოითხოვა 2017 წლის 25 მაისდან 30 მაისის ჩათვლით აფგან მუხტარლის მფლობელობაში არსებული მობილური ტელეფონის ნომერზე შემავალი და გამავალი ზარების დეტალური ნუსხა, ასევე ინფორმაცია ტელეფონის ე.წ. IMEI კოდებისა და მომსახურე ანძების თაობაზე. გამოძიების მიერ აზერბაიჯანის შესაბამისი ორგანოებს სამართლებრივი დახმარების აღმოჩენის მიზნით გაეგზავნათ შუამდგომლობა მათ წარმოებაში არსებული სისხლის სამართლის საქმის მასალების გამოთხოვისა და აფგან მუხტარლის დეტალური დაკითხვის თაობაზე. ასევე ეთხოვათ დაკითხვის დროს ქართული მხარის დასწრების შესახებ“, - განაცხადა მღებრიშვილმა.