ნათია თურნავამ მომხმარებელთა უფლებების დაცვის თემაზე გამართულ საერთაშორისო კონფერენციაში მიიღო მონაწილეობა

საქართველოს ეროვნული ბანკის პრეზიდენტმა ნათია თურნავამ მომხმარებლის დაცვის IV საერთაშორისო კვირეულში მიიღო მონაწილეობა. ინფორმაციას ეროვნული ბანკი ავრცელებს.

ღონისძიება კონკურენციისა და მომხმარებლის დაცვის სააგენტოს, საქართველოს ეროვნული ბანკის, ენერგეტიკისა და წყალმომარაგების მარეგულირებელი ეროვნული კომისიის, საქართველოს კომუნიკაციების კომისიის, საქართველოს დაზღვევის სახელმწიფო ზედამხედველობის სამსახურისა და სურსათის ეროვნული სააგენტოს ორგანიზებით გაიმართა.

კონფერენციის მიზანი მომხმარებელთა უფლებების დაცვასთან დაკავშირებული აქტივობების სისტემური გაანალიზება და საკუთარი უფლებების დაცვის არსებული მექანიზმების შესახებ მომხმარებელთა ცნობიერების ამაღლებაა. ღონისძიება როგორც არსებული სტანდარტებისა და განხორციელებული რეფორმების შეფასებას, ისე სამომავლო ნაბიჯების განსაზღვრას ემსახურება, რაც მათ შორის, ფინანსური სექტორის სტაბილურობასა და მომხმარებლების უფლებათა დაცვას უზრუნველყოფს.

სიტყვით გამოსვლისას ნათია თურნავამ მომხმარებელთა უფლებების დაცვის მიმართულებით საქართველოს ეროვნული ბანკის როლსა და ბოლო წლებში განხორციელებულ ცვლილებებზე ისაუბრა. მისი განცხადებით, ეროვნული ბანკისთვის მომხმარებელთა უფლებების დაცვა მნიშვნელოვანი პრიორიტეტია, რადგან ფინანსურად მდგრადი და დაცული მომხმარებელი ფინანსური სექტორის სიჯანსაღისა და ფინანსური სტაბილურობის ერთ-ერთ მთავარ საფუძველს წარმოადგენს.

„ფინანსურად მდგრადი და დაცული მომხმარებელი ფინანსური სექტორის სიჯანსაღისა და ფინანსური სტაბილურობის ერთ-ერთი ძირითადი ხელშემწყობი ფაქტორია. სწორედ ამიტომ, მომხმარებელთა უფლებების დაცვა საქართველოს ეროვნული ბანკისთვის მნიშვნელოვანი ამოცანაა და ამ მიმართულებით მუდმივად ვმუშაობთ, რათა საფინანსო სექტორის გარემო კიდევ უფრო მეტად იყოს მომხმარებელზე ორიენტირებული“, - აღნიშნა ნათია თურნავამ.

სებ-ის პრეზიდენტმა ყურადღება 2025 წელს განხორციელებულ მნიშვნელოვან ინიციატივებზე გაამახვილა. მისი თქმით, მომხმარებელთა უფლებების დაცვის მარეგულირებელი ჩარჩოს გარკვეული მოთხოვნები საგადახდო მომსახურების პროვაიდერებზეც გავრცელდა, რის საფუძველზეც ისინი ვალდებულნი არიან მიიღონ და დაამუშაონ მომხმარებელთა პრეტენზიები და დადგენილ ვადებში უპასუხონ მათ. ამასთან, აღნიშნული პრეტენზიების შესახებ ანგარიშგება ეროვნულ ბანკს ყოველთვიურად ეგზავნება და მომხმარებელთა უფლებების დაცვის დეპარტამენტი მათ სისტემურ და ინდივიდუალურ დონეზე სწავლობს.

ნათია თურნავამ საქართველოს ეროვნულ ბანკთან მოქმედ დავების განმხილველ კომისიაზეც ისაუბრა, რომელიც საგადახდო მომსახურებასთან დაკავშირებულ მომხმარებელთა დავებს განიხილავს. მისი თქმით, კომისიის საქმიანობის ორი წლის განმავლობაში მას 162-მა მომხმარებელმა მიმართა, საიდანაც 113 საჩივარი წარმოებაში იქნა მიღებული, ხოლო დასრულებული საქმეების დიდი ნაწილი, დაახლოებით 80%, მომხმარებლების სასარგებლოდ გადაწყდა. პროვაიდერების მიერ მომხმარებლებისთვის უკვე ანაზღაურებულმა თანხამ 400 000 ლარს გადააჭარბა.

„კომისია მომხმარებლებისთვის დავის განხილვის სწრაფ, ეფექტურ და უფასო მომსახურებას უზრუნველყოფს. ნებისმიერ მომხმარებელს შეუძლია მარტივად დაიცვას თავისი უფლება იმ შემთხვევებში, როდესაც მიიჩნევს, რომ ადგილი ჰქონდა არაავტორიზებულ ოპერაციას, არასწორად შესრულებულ ტრანზაქციას ან სხვა ტიპის დარღვევას. ჩვენი მიზანია, მომხმარებელს ჰქონდეს სამართლიანი და ხელმისაწვდომი მექანიზმი საკუთარი უფლებების დასაცავად“, - განაცხადა ნათია თურნავამ.

საქართველოს ეროვნული ბანკის პრეზიდენტმა ფინანსური განათლების მნიშვნელობას გაუსვა ხაზი. მისი თქმით, მომხმარებელთა ეფექტიანი დაცვა მხოლოდ რეგულაციებით არ შემოიფარგლება და დიდწილად საზოგადოების ინფორმირებულობაზეა დამოკიდებული.

აღნიშნული მიმართულებით ეროვნული ბანკი ფინანსური განათლების პროგრამებს აქტიურად ახორციელებს და ამ პროცესში მნიშვნელოვან როლს საგანმანათლებლო პლატფორმა ფინედუ ასრულებს, რომელიც მოქალაქეებს ფინანსურ საკითხებზე მარტივ, ობიექტურ და არაკომერციულ ინფორმაციას აწვდის.

საერთაშორისო კონფერენციის ფარგლებში გამართულ პანელურ დისკუსიებში მონაწილეობა მიიღეს ეროვნული ბანკის მომხმარებელთა უფლებების დაცვის დეპარტამენტის უფროსმა ლაშა გზირიშვილმა, ამავე დეპარტამენტის საბაზრო ქცევის ზედამხედველობის განყოფილების უფროსმა ნათია ჭყონიამ.

9-16 მარტს თბილისში, გარდაბანში, გორში, ბათუმსა და წყალტუბოში მომხმარებლის დაცვის IV საერთაშორისო კვირეული გაიმართება. მასშტაბური ღონისძიება მომხმარებელთა უფლებების დაცვის საერთაშორისო დღეს უკავშირდება, რომელიც ყოველწლიურად 15 მარტს აღინიშნება.