30 აგვისტოს საერთაშორისო დოკუმენტური კინოფესტივალის CinéDOC-Tbilisi მერვე გამოშვება გაიხსნება

30 აგვისტოს, 20:30 საათზე, Cavea Drive-in ლისზე მერვე საერთაშორისო დოკუმენტური კინოფესტივალის CinéDOC-Tbilisi გაიხსნება. საქართველოს კინემატოგრაფიის ეროვნული ცენტრის ინფორმაციით, კორონავირუსის პანდემიის გამო,ფესტივალი წელს განსხვავებული ფორმატით და რეკომენდაციების სრული დაცვით ჩატარდება.

ჩვენ ვქმნით ემოციებს – წელს კინოფესტივალი ამ სლოგანის გარშემო ერთიანდება და მაყურებელს ყველაზე რეალური და დაუვიწყარი ემოციების სამყაროში მოგზაურობას სთავაზობს.

ფესტივალს გახსნის ნინო ორჯონიკიძისა და ვანო არსენიშვილის ფილმი სახელწოდებით „გვირაბი“. ეს არის კინოფილმი გვირაბზე, რომელმაც ჩინეთიდან ევროპამდე გზა უნდა შეამციროს. საქართველოს ერთ-ერთ სოფელში შემოჭრილი გვირაბი კი ახალი გამოწვევების მიზეზი ხდება. ამბოხს ჯერ ადამიანები იწყებენ შემდეგ კი ბუნება. „გვირაბის“ პრემიერა 2019 წელს ამსტერდამის დოკუმენტური ფილმების კინოფესტივალზე (IDFA) შედგა.

წელს ფესტივალი ინოვაციური ფორმატით იმართება. ის რამდენიმე პლატფორმას მოიცავს და მაყურებელს შესაძლებლობას აძლევს მისთვის სასურველ გარემოში უახლესი შემოქმედებითი დოკუმენტური ფილმები იხილოს. პანდემიასთან ბრძოლამ ფესტივალის ორგანიზატორებს ახალ რეალობასთან მორგებისკენ უბიძგა, რის შედეგადაც წლევანდელი ფესტივალის ჰიბრიდული ფორმატი დაიბადა.

CinéDOC-Tbilisi-ის გახსნას, 30 აგვისტოს, Cavea Drive-in ლისი უმასპინძლებს. ფესტივალის ფარგლებში წარმოდგენილი ფილმების ნახვა მაყურებელს სხვადასხვა პლატფორმაზე შეეძლება: საქართველოს საზოგადოებრივ მაუწყებელთან თანამშრომლობის ფარგლებში, 18-28 აგვისტოს, ყოველ ოთხშაბათსა და პარასკევს, 23:30 საათზე, პირველი არხის ეთერი CinéDOC-ის კინოდარბაზად გადაიქცევა; ფიზიკურ ჩვენებებს უმასპინძლებს Cavea Drive-in Lisi, კავკასიური სახლი და სასტუმრო „სტამბა“; ონლაინპორტალზე - Cinedoc-tbilisi.com კი 23-30 სექტემბერს უფასო ონლაინჩვენებები მოეწყობა. აღსანიშნავია, რომ ბათუმის საავტორო ფილმების საერთაშორისო კინოფესტივალსა და CinéDOC-Tbilisi-ს თანამშრომლობის ფარგლებში, 4 საავტორო ფილმი იქნება ნაჩვენები. One Caucasus 2020 ფარგლებში, კი მაყურებელი CinéDOC Young - ის ფილმებს იხილავს. მინიფესტივალები გაიმართება დუშეთში, გორში, საგარეჯოში, ჩხოროწყუსა და მარნეულში.

წლევანდელი პროგრამა მოიცავს 7 სექციას:

1. International Competition / საერთაშორისო საკონკურსო სექცია - მთავარი საკონკურსო სექცია სადაც წელს თავს იყრის რვა საერთაშორისო ფილმი;
2. Focus Caucasus - წარმოდგენილი იქნება ადგილობრივი და რეგიონული ფილმები ისეთი ქვეყნებიდან როგორებიცაა საქართველო, სომხეთი, აზერბაიჯანი;
3. Swiss DOX - შვეიცარული შემოქმედებითი დოკუმენტური და ანიმაციური ფილმები;
4. Guest Country - სექციაში, სტუმარი ქვეყანა წელს წარმოდგენილი იქნება ფინური დოკუმენტური კინო;
5. CinéDOC Young - საბავშო სექცია, რომლის ფარგლებშიც იმართება ჩვენებები ბავშვებისა და ახალგაზრდებისთვის;
6. EroticDOX;
7. Special Screenings - სპეციალური არასაკონკურსო ჩვენებები;
ფესტივალის ფარგლებში, ასევე წარმოდგენილი იქნება 9 ქართველი რეჟისორის ნამუშევარი.

CinéDOC-Tbilisi პირველი საერთაშორისო დოკუმენტური კინოფესტივალია სამხრეთ კავკასიაში, რომელიც 2013 წლიდან ტარდება და მისი მიზანი კრეატიული დოკუმენტური კინოს პოპულარიზაციაა.

ფესტივალის პარტნიორები არიან: საქართველოს განათლების, მეცნიერების, კულტურისა და სპორტის სამინისტრო, საქართველოს კინემატოგრაფიის ეროვნული ცენტრი, საქართველო, შვეიცარიის განვითარებისა და თანამშრომლობის სააგენტო, შვეიცარიის საელჩო საქართველოში, ევროკავშირის პროგრამა შემოქმედებითი ევროპა, ქალაქ თბილისის მუნიციპალიტეტის მერია, Doc Lounge შვედეთი, შვედეთის ინსტიტუტი (Swedish Institute – Creative Force Program), შვედეთის საელჩო თბილისში, ბათუმის საავტორო კინოს ფესტივალი, კავკასიური სახლი, საქართველოს საზოგადოებრივი მაუწყებელი, TheFinnish Film Foundation, DaFilms, Current Time Tv, საქართველოს ფრანგული ინსტიტუტი.

დეტალური ინფორმაცია ფესტივალის პროგრამის შესახებ იხილეთ ბმულზე: www.cinedoc-tbilisi.com