ევროპარლამენტი უნგრეთის წინააღმდეგ სანქციების შემოღებას ითხოვს

ევროპარლამენტმა, ოთხშაბათის პლენარულ სხდომაზე სტრასბურგში, მიიღო რეზოლუცია, რომელშიც ითხოვს იმ პროცედურების დაწყებას, რაც უნგრეთის წინააღმდეგ შეიძლება სანქციების ამოქმედებით დასრულდეს. დეპუტატებს მიაჩნიათ, რომ ამ ქვეყანაში კანონის უზენაესობას საფრთხე ემუქრება. ინფორმაციას Reuters-ი ავრცელებს.

რეზოლუციას, რომელიც ოთხმა ფრაქციამ მოამზადა, მხარი დაუჭირა 393 დეპუტატმა, 221-მა წინააღმდეგ მისცა ხმა, ხოლო 64-მა - თავი შეიაკავა.

დოკუმენტში არის მოწოდება, რომ უნგრეთში კანონის უზენაესობის და დემოკრატიის გაუარესების გამო, ქვეყნის მიმართ შეჩერდეს ან შეწყდეს რიგი კანონების მოქმედება და დაწესდეს გაძლიერებული კონტროლი ბუდაპეშტის მიერ ევროკავშირის ბიუჯეტის თანხების გამოყენებაზე.

დეპუტატები შეშფოთებულები არიან უნგრეთში სიტყვის თავისუფლების, აკდემიური თავისუფლების, მიგრანტების უფლებების, შეკრების თავისუფლების მდგომარეობით, ასევე არასამთავრობო ორგანიზაციების მუშაობის შეზღუდვით და სხვა ფუნდამენტური პრინციპების დარღვევით. მათ აშფოთებთ ვიქტორ ორბანის მთავრობის ინიციატივა "შეაჩერეთ ბრიუსელი" და ჯორჯ სოროსის უნივერსიტეტის CEU-ს უცხოელი თანამშრომლების მიმართ დაწყებული გამოძიება.

ევროკავშირის შეთანხმების თანახმად, ევროპარლამენტს შეუძლია აღნიშნული პროცედურის დაწყების ინიციატორი იყოს, რაც საბოლოო ჯამში ქვეყანას ევროპის კავშირის საბჭოში ხმის უფლებას დააკრგვინებს. თუმცა ამისთვის ევროპარლამენტმა ხმათა 2/3-ით უნდა მოიწონოს მისივე კომიტეტის მიერ მომზადებული ანგარიში არსებულ დარღვევებზე, რომელიც ჯერ დაწერილი არ არის, თუმცა მიღებულ რეზოლუციაში არის მოწოდება, რომ ასეთი ანგრიში მომზადდეს.

უნგრეთის პრემიერმინისტრი და პარტია "ფიდესის" ლიდერი ვიქტორ ორბანი ქვეყანას პირველად 1998-2002 წლებში მართავდა, შემდეგ 2010 წელს კვლავ პრემიერმინისტრი გახდა და დღემდე ამ თანამდებობაზეა. ორბანის ხელისუფლებაში ყოფნის პერიოდს უნგრეთში დემოკრატიის ხარისხის მკვეთრ გაუარესებას უკავშირებენ.

უნგრეთი ევროკავშირის წევრი 2003 წელს გახდა.