ჯეიმს კომი: ტრამპი პირადად მის მიმართ ერთგულებას მთხოვდა

8 ივნისს აშშ-ს გამოძიების ფედერალური ბიუროს (FBI) ყოფილი ხელმძღვანელი ჯეიმს კომი სენატის დაზვერვის კომიტეტის წინაშე წარსდგება, რომელიც 2016 წლის საპრეზიდენტო არჩევნებში რუსეთის შესაძლო ჩარევას და ამაში ტრამპის საარჩევნო შტაბის წევრების მონაწილეობას იძიებს. მანამდე კი მედიისთვის კომის განცხადება გახდა ცნობილი, რომელიც მან სენატის საგამოძიებო კომიტეტზე უკვე წარმოთქვა. BBC-ის ცნობით, ამ განცხადებაში კომი ამბობს,რომ პრეზიდენტი ტრამპი პირადად მის მიმართ ერთგულებას თხოვდა.

სენატის კომიტეტის მიერ გამოქვეყნებულ მასალაში ჯეიმს კომი 27 იანვარს ტრამპთან ერთად საქმიანი ვახშმის დეტალებს იხსენებს. ყოფილი მაღალჩინოსანის განცხადებით, მას დარჩა შთაბეჭდილება, რომ პრეზიდენტი გამოძიების ფედერალურ ბიუროზე „პატრონაჟის მსგავსი ურთიერთობის“ დამყარებას ცდილობდა. „ამან ძალიან შემაშფოთა, თუ გავითვალისწინებთ, რომ გამოძიების ფედერალურ ბიუროს აღმასრულებელ ხელისუფლებაში ტრადიციულად დამოუკიდებელი სტატუსი აქვს,“-ამბობს კომი. დონალდ ტრამპმა ყოფილ მაღალჩინოსანს შემდეგი სიტყვებით მიმართა: „მე მინდა ერთგულება. ველოდები ერთგულებას.“

კომი ასევე აცხადებს, რომ პრეზიდენტი მას ნაციონალური უსაფრთხოების საკითხებში ყოფილი მრჩევლის მაიკლ ფლინის წინააღმდეგ საქმის გამოძიების შეწყვეტას მოითხოვდა, რომელიც აშშ-ში რუსეთის ელჩ სერგეი კისლიაკთან კონტაქტების დამალვაშია ეჭვმიტანილი. „იმედი მაქვს, თქვენ თავს დაანებებთ გამოძიებას და ფლინს, ის კარგი ბიჭია,“- ასე მიმართა ტრამპმა კომის. გამოძიების ფედერალური ბიუროს ყოფილი ხელმძღვანელი ტრამპთან 30 მარტს გამართულ სატელეფონო საუბარსაც იხსენებს, სადაც პრეზიდენტმა განაცხადა, რომ მისი რუსეთთან შესაძლო კავშირების შესახებ მიმდინარე გამოძიება „ღრუბელია“, რომელიც მას ქვეყნის მეთაურის რანგში მოქმედებებში უშლის ხელს.

პრეზიდენტმა ტრამპმა ჯეიმს კომი თანამდებობიდან 10 მაისს გადააყენა და განაცხადა, რომ ყოფილი ხელმძღვანელი ბიუროს ეფექტიანად მართვას ვერ ახერხებდა. მოულოდნელი გადაწყვეტილება მიღებულ იქნა რამდენიმე საათში მას შემდეგ, რაც ცნობილი გახდა, რომ ჯეიმს კომიმ სენატში გამოსვლისას ჰილარი კლინტონის წერილებზე არასწორი მონაცემები მოიყვანა. დემოკრატების საპრეზიდენტო კანდიდატი თავის მარცხს არჩევნებში კომის აბრალებდა. ტრამპის კრიტიკოსები ვარაუდობენ, რომ კომის გათავისუფლება ამერიკის საპრეზიდენტო არჩევნებში რუსეთის შესაძლო ჩარევის შესახებ გამოძიებას უკავშირდება. თავად პრეზიდენტმა ამ გამოძიებას „კუდიანებზე ნადირობა“ უწოდა.

ტრამპი აშშ-ის ისტორიაში მეორე პრეზიდენტია, ვინც FBI-ის უფროსი მოხსნა. 1993 წელს ბილ კლინტონმა ამ თანამდებობდან უილიამ სეშნსი გადააყენა.