რუსულ და უკრაინულ კომპანიებზე მასშტაბური კიბერთავდასხმა განხორციელდა

ცოტა ხნის წინ, რუსულ და უკრაინულ კომპანიებსა და სახელმწიფო დაწესებულებების სერვერებზე მასშტრაბური კიბერშეტევა განხორციელდა. ერთდროულად გადაიტვირთა შვილობილი კომპანიების სერვერებიც. ამის შესახებ ინფორმაცია ადგილობრივ მედიაში და სახელმწიფო უწყებების ვებგვერდებზე ვრცელდება.

“როსნეფტის“ სერვერებზე მასშტაბური ჰაკერული თავდასხმა განხორციელდა. ამის შესახებ კომპანია Twitter-ზე იუწყება.

На серверы Компании осуществлена мощная хакерская атака. Мы надеемся, что это никак не связано с текущими судебными процедурами.

— ПАО «НК «Роснефть» (@RosneftRu) 27 июня 2017 г.

გავრცელებული განცხადებით, კომპანიამ უკვე მიმართა სამართალდამცავ ორგანოებს. არსებული ინფორმაციით, თავდასხმისას ვირუსი WannaCry გამოიყენეს. 

“როსნეფტში“ შემავალი რამდენიმე კომპანიის სისტემა ერთდროულად გადაიტვირთა, რის შემდეგაც გამოჩნდა წარწერა, რომლის მიხედვითაც თავდამსხმელები გამოსასყიდს ითხოვდნენ.

კომპანიაში აცხადებენ, რომ მართვის სარეზერვო სისტემაზე გადავიდნენ. მისი ვებგვერდი აღარ იხსნება.

ჰაკერული თავდასხმა განხორციელდა უკრაინულ კომპანიებზე, ბანკებზე, აეროპორტზე და მინისტრთა კაბინეტზეც.  ეროვნული ბანკის ინფორმაციით, ჰაკერებმა ვირუსი Petya გამოიყენეს, რის საშუალებითაც საბანკო სექტორის პარალიზება მოახერხეს. 

ჰაკერული თავდასხმა განხორციელდა მინისტრთა კაბინეტის წევრების ვებგვერდებზე. რამდენიმე დეპუტატი სოციალური ქსელების საშუალებით წერს, რომ მათი კომპიუტერები მოულოდნელად გაითიშა, შემდეგ კი ეკრანზე უცნაური წარწერები გაჩნდა. 

ჰაკერების სამიზნეში მოხვდა ბორისპოლის აეროპორტიც. აეროპორტის საინფორმაციო სისტემა პარალიზებულია. არ მუშაობს ვებგვერდი, გათიშულია საინფორმაციო დაფა. პარალიზებულია რამდენიმე მედიასაშუალების ვებგვერდებიც, მათ შორის 24 -ე არხის, "კორესპონდენტის", რადიო "ლუკსის" და რადიო "მაქსიმუმის" ვებგვერდები.

კიბერშეტევა, რომელმაც რამდენიმე უკრაინული კომპანიის და სახელმწიფო დაწესებულების კომპიუტერული სისტემა დაბლოკა, ბანკის Home Credit სისტემასაც შეეხო. ასევე დაზარალდა კომპანია Evraz, რომლის ერთ-ერთი ბენეფიციარი, რომან აბრამოვიჩი გახლავთ.