ტრამპი: მედიამ არასწორად განმარტა ჩემი საიმიგრაციო პოლიტიკა

აშშ-ის პრეზიდენტი დონალდ ტრამპი მის საიმიგრაციო გადაწყვეტილებებზე დაწყებულ საპროტესტო კამპანიას გამოეხმაურა და აღნიშნა, რომ მისი განკარგულება მიგრანტებზე არის არა მუსლიმების წინააღმდეგ მიმართული აკრძალვა და რელიგიის თემა, არამედ ტერორიზმის და ქვეყნის უსაფრთხოების დაცვის საკითხი.

ტრამპის თქმით, მსოფლიოში 40 სხვადასხვა ქვეყანაა, რომლის მოსახლეობის უმრავლესობა მუსლიმია, მაგრამ ამ ქვეყნებზე ეს შეზღუდვა არ ვრცელდება, - წერს პრეზიდენტი სპეციალურ განცხადებაში. "ჩემი პოლიტიკა ჰგავს იმას, რაც პრეზიდენტმა ობამამ 2011 წელს გააკეთა, როდესაც მან 6 თვით აკრძალა ვიზების გაცემა ერაყიდან დევნილებისთვის. ჩემს განკარგულებაში ჩამოთვლილია ის ქვეყნები, რომლებიც პრეზიდენტ ობამას ადმინისტრაციამ ტერორის წყაროდ განსაზღვრა", - აცხადებს ტრამპი.   

პრესისთვის გამოქვეყნებულ პრეზიდენტის განცხადებას ტელეკომპანია ABC News-ი Twitter-ზე აქვეყნებს.

JUST IN: Pres. Trump issues statement on immigration order: "This is not about religion—this is about terror and keeping our country safe." pic.twitter.com/2922PjBSEK

— ABC News (@ABC) January 29, 2017

ტრამპის განკარგულება - აშშ-ის ტერორიზმისგან დაცვის შესახებ - ქვეყანაში რადიკალური ისლამისტების შესვლას კრძალავს. დოკუმენტი 120 დღით წყვეტს დევნილების აშშ-ში მიღებას, კრძალავს სირიიდან დევნილების განუსაზღვრელი ვადით ყოფნას და ამკაცრებს აშშ-ში შესვლის ზოგიერთ წესს. ასევე 90 დღით აჩერებს ქვეყანაში რამდენიმე მუსლიმური ქვეყნის (ირანი, ერაყი, ლიბია, სომალი, სუდანი, სირია, იემენი) მოქალაქეების შესვლას.

ტრამპის საიმიგრაციო გადაწყვეტილებები 15 შტატის გენერალურმა პროკურორებმა გააკრიტიკეს, რომლებიც, გავრცელებული ინფორმაციით, დემოკრატიულ პარტიას წარმომადგენენ. მათ გამოაქვეყნეს განცხადება, სადაც აღნიშნულია, რომ ტრამპის გადაწყვეტილებები ეწინააღმდეგება აშშ-ის კონსტიტუციას და ამერიკის სახელმწიფოს ფუნდამენტურ იდეას - თავისუფლებას ამახინჯებს.