მელიასთვის იმუნიტეტის შეჩერებაზე მსჯელობას ნაციონალები და ევროპული საქართველო არ ესწრებიან

„ნაციონალური მოძრაობის“ პოლიტიკური საბჭოს თავმჯდომარე ნიკა მელია პარლამენტის სხდომათა დარბაზში შევიდა.

მელიამ თქვა, რომ ჯერ არ აქვს გადაწყვეტილი, მიმართავს თუ არა საპარლამენტო ტრიბუნიდან „ქართული ოცნების“ დეპუტატებს.

სესია უკვე დაიწყო. მთავარი საკითხია მელიასთვის დეპუტატის იმუნიტეტის შეჩერება. „ნაციონალური მოძრაობა და „ევროპული საქართველო" სესიას ბოიკოტს უცხადებს.

დეპუტატების განცხადებით, ეს არის სიმბოლური პროტესტი - დღევანდელ სხდომაზე ოპოზიციის ფლანგზე მხოლოდ ნიკა მელია იჯდება.

რომან გოცირიძის განცხადებით, ამ ფორმით ოპოზოცია უსამართლობას აპროტესტებს და საერთაშორისო თანამეგობრობის ყურადღების მიქცევას ცდილობს.

„პატრიოტთა ალიანსი“ კენჭისყრაში არ აპირებს მონაწილეობას. ირმა ინაშვილის თქმით, მათი მოთხოვნაა, რომ სადეპუტატო იმუნიტეტი გიგა ბოკერიას მოეხსნას. 

პარლამენტის წევრს ნიკა მელიას საქართველოს გენერალურმა პროკურატურამ ბრალი წაუყენა. როგორც პროკურორმა განაცხადა მელიას მიმართ გამოიკვეთა სისხლის სამართლის კოდექსით გათვალისწინებული დანაშაულის ნიშნები. 

პროკურატურამ საქართველოს პარლამენტს მელიასთვის დეპუტატის იმუნიტეტის მოხსნასთან დაკავშირებით მიმართა. თავად ნიკა მელია მისთვის ბრალის წაყენებას პატივად აფასებს. 

21 ივნისს შინაგან საქმეთა სამინისტროში ბრიფინგი გაიმართა, რომელზეც ითქვა, რომ ჯგუფური ძალადობის ორგანიზების საქმეზე გამოკითხვაზე დაიბარეს ნიკა მელია, გიგი უგულავა და ირაკლი ოქრუაშვილი. საქმე ეხება 19-20 ივნისის საპროტესტო აქციას.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.