საარჩევნო საკითხებზე მომუშავე ჯგუფი 8 ივლისს შეიკრიბება

საარჩევნო საკითხებზე მომუშავე ჯგუფი 8 ივლისს შეიკრიბება. მთავარი თემა 2020 წელს პროპორციული სისტემით და ნულოვანი ბარიერით საპარლამენტო არჩევნების ჩატარება იქნება.

მმართველი პარტია მზად არის ყველა იმ ცვლილებისთვის, რომელსაც ბუნებრივი ბარიერი მოითხოვს. მათ შორის არის პარტიების დაფინანსებისა და უფასო საეთერო დროის გადანაწილების საკითხი.

ამ ეტაპზე კონკრეტულ წინადადებებზე საუბრისგან პარტიები თავს იკავებენ, თუმცა ამბობენ, რომ პროპორციული არჩევნები მათ მეტი სამართლიანობისთვის სჭირდებათ. 

ოპოზიციისთვის ახლა მნიშვნელოვანია კვალიფიციური სუბიექტის განსაზღვრის ახალი მოდელი, დაფინანსების ახალი ფორმულა, საარჩევნო ადმინისტრაციის დაკომპლექტების წესი და უფასო საეთერო დრო. 

„ჩვენ პროპორციული სისტემა იმიტომ გვინდა, რომ სამართლიანობის ხარიხსი გაიზარდოს. ამ სამართლიანობის საზომით უნდა მივუდგეთ ცესკოს დაკომპლექტების წესს, დაფინანსების წესს, მედიის გამოყენების წესს, საჯარო მოხელეების მონაწილეობის პრაქტიკას და გავასწოროთ ეს ყველაფერი სამართლიანობისკენ. მაშინ იქნება ეს პროცესი ლოგიკური“, - განაცხადა „შენების მოძრაობის“ ლიდერმა დავით უსუფაშვილმა.

„ჯერ იმაზე უნდა ვიმსჯელოთ, არის თუ არა ბუნებრივი ბარიერი მისაღები ყველა მნიშვნელოვანი პოლიტიკური სუბიექტისთვის, იმიტომ რომ კონსტიტუცია ქვეყანაში ერთი ადამიანის გადაწყვეტილებით არ უნდა იცვლებოდეს. ჩვენთვის მნიშვნელოვანია, რომ ამ ცვლილებაზე საზოგადოებრივი კონსენსუსი შეიქმნას და ასევე მნიშვნელოვანია საერთაშორისო პარტნიორების აზრი ამ ცვლილებასთან დაკავშირებით“, - ამბობს „ნაციონალური მოძრაობის“ წევრი სალომე სამადაშვილი. 

რაც შეეხება „ქართულ ოცნებას“, მმართველ პარტიაში დაფინანსების წესზე საუბრისგან ჯერჯერობით თავს იკავებენ და ელოდებიან სამუშაო ჯგუფის შეკრებას და ოპოზიციის წინადადებებს. თუმცა „ოცნების“ ლიდერები არ მალავენ, რომ დღეს მოქმედი ვერსია არასწორია.

„ვურჩევ საზოგადოებას და ექსპერტებს, რომ ნახონ, თუ როგორ არის საბიუჯეტო დაფინანსება ან უფასო საეთერო დრო გადანაწილებული პოლიტიკურ პარტიებზე. ეს რიცხვები რეალურად აჩვენებს იმ პრეტენზიებს, რაც სხვა პარტიებს აქვთ. ეუთო თავის რეკომენდაციებში ითხოვს ამ მიმართულებით რეფორმის გატარებას. ბუნებრივია, მზად ვართ ამ სისტემის შესაცვლელად. უნდა მივიღოთ ისეთი სისტემა, რომ ყველა პოლიტიკურმა პარტიამ სამართლიანი დაფინანსება მიიღოს და გაუჩნდეს შანსი, განავითაროს მთლიანი პოლიტიკური სისტემა და ერთ პოლიტიკურ პარტიას არ ჰქონდეს ექსკლუზივი მთელ ოპოზიციაში“, - განაცხადა პარლამენტის თავმჯდომარემ არჩილ თალაკვაძემ.

პარტია „ქართული ოცნების“ თავმჯდომარე ბიძინა ივანიშვილი გამოდის ინიციატივით, რომ 2020 წლის საპარლამენტო არჩევნები პროპორციული სისტემით, ნულოვანი ბარიერის პირობებში ჩატარდეს. აღნიშნული განცხადება ივანიშვილმა 24 ივნისს გამართულ საგანგებო ბრიფინგზე გააკეთა.