ხაზარაძე და ჯაფარიძე „თიბისი ბანკის“ დირექტორთა საბჭოს ხელმძღვანელობიდან მიდიან

„იქედან გამომდინარე, რომ არ დასრულდა უსამართლო თავდასხმები ჩვენზე და ამის გამო ზარალდებიან ბანკი, მისი აქციონერები და თანამშრომლები, ვტოვებთ ბანკში დაკავებულ თანამდებობებს, ვიდრე არ დასრულდება ეს აბსურდული პროცესი“, - ეს ტექსტი თიბისი ბანკის დამფუძნებელმა მამუკა ხაზარაძემ Facebook-ზე გამოაქვეყნა.

მისი ეს პოსტი პროკურატურის მიერ ბრალის წარდგენას და ლონდონის ბირჟაზე „თიბისი ბანკის“ აქციების ფასის შემცირებას მოჰყვა. 

„როგორც იცით დღეს პროკურატურის ბრიფინგმა საბჭოთა ტრადიციების შესაბამისად უკვე მესამედ, ბოლო 6 თვის განმალობაში მძიმე შედეგი მიაყენა თბს ბანკის აქციების ფასს, როგორც იანვარ -თებერალში დღესაც მისი ფასი დაახლოებით 12 %-ით გაუფასურდა დღის განმავლობაში.

შედეგად ბანკის აქციონერებმა დღეს 130 მლ დოლარით იზარალეს. წინა ორ ბრიფინგსაც იგივე შედეგები ჰქონდა.

ეს არის მიზანმიმართული ქმედება საერთაშორისო ინვესტორების და ჩვენი ქვეყნის ფინანსური სტაბილურობის წინააღმდეგ. 

აქვე მინდა შეგახსენოთ, რომ 24 ივნისს ლონდონში ჩვენმა აქციონერებმა მე და ბადრი 98% ხმათა რაოდენობით თავიდან აგვირჩიეს ბანკის თავმჯდომარედ და მის მოადგილედ, რისთვისაც მადლობას ვუხდით თითოეულ მათგანს ასეთი ნდობისათვის.

თუმცა იქედან გამომდინარე, რომ არ დასრულდა უსამართლო თავდასხმები ჩვენზე და ამის გამო ზარალდებიან ბანკი, მისი აქციონერები და თანამშრომლები, ამიტომ ვტოვებთ ბანკში დაკავებულ თანამდებობებს, ვიდრე არ დასრულდება ეს აბსურდული პროცესი.

ჩვენ გვჯერა რომ ინსტიტუტი რომელსაც 27 წელიწადი ვაშენებდით და რომელიც წარმატების სიმბოლო გახდა ჩვენი ქვეყნისათვის დაუბრკოლებლად გააგრძელებს თავისი სტრატეგიული მიზნების განხორციელებას. სიმართლე აუცილებლად გაიმარჯვებს!!!“, - წერს ხაზარაძე.

პროკურატურამ მამუკა ხაზარაძეს და ბადრი ჯაფარიძეს ბრალი დღეს წარუდგინა, რის შემდეგაც მათ საგამოძიებო უწყება დატოვეს. პროკურატურა მათთვის აღკვეთის ღონისძიების შეფარდების მოთხოვნით საქალაქო სასამართლოს სავარაუდოდ მიმართავს.  

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონ დოლარზე. 

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო.

9 ივლისს კი გაირკვა, რომ მამუკა ხაზარაძე საზოგადოებრივ მოძრაობას აფუძნებს.