ბრიტანეთის საელჩო თიბისის საქმეზე: კრიტიკულად მნიშვნელოვანია, რომ პროცესები გამჭვირვალედ წარიმართოს

საქართველოში დიდი ბრიტანეთის საელჩო საქართველოს გენერალური პროკურატურის მიერ „თიბისი ბანკის” თანადამფუძნებლების, მამუკა ხაზარაძისა და ბადრი ჯაფარიძის მიმართ წაყენებულ ბრალდებასთან დაკავშირებით განცხადებას ავრცელებს. 

საელჩოს განცხადების თანახმად, დიდი ბრიტანეთი ყურადღებით აკვირდება ამ საკითხის ირგვლივ განვითარებულ მოვლენებს. საელჩოს განცხადებით, კრიტიკულად მნიშვნელოვანია, რომ პროცესები გამჭვირვალედ წარიმართოს.

„დიდი ბრიტანეთი ყურადღებით აკვირდება საქართველოს გენერალური პროკურატურის მიერ „თიბისი ბანკის” თანადამფუძნებლების - მამუკა ხაზარაძისა და ბადრი ჯაფარიძის მიმართ წაყენებული ბრალდებების ირგვლივ განვითარებულ მოვლენებს, რომლებიც რამდენიმე წლის წინ განხორციელებულ საბანკო მოქმედებებს ეხება. კრიტიკულად მნიშვნელოვანია, რომ ამ საქმის გარშემო პროცესები გაჭვირვალედ და მიუკერძოებლად წარიმართოს. ეს აუცილებელია ქართული საბანკო სექტორისთვის, ამ სფეროში მრავალმხრივი უცხოური ინვესტიციების მოსაზიდად და ქვეყნის ინკლუზიური ეკონომიკური ზრდისათვის”, - წერია საქართველოში დიდი ბრიტანეთის საელჩოს მიერ გავრცელებულ განცხადებაში.

„თიბისი ბანკის“ ირგვლივ მიმდინარე მოვლენებზე განცხადება საქართველოში აშშ-ის საელჩომაც გაავრცელა. განცხადების თანახმად, საელჩო ხაზარაძისა და ჯაფარიძისთვის ბრალის წაყენების კონტექსტით შეშფოთებულია.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონ დოლარზე. 

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო.

9 ივლისს კი გაირკვა, რომ მამუკა ხაზარაძე საზოგადოებრივ მოძრაობას აფუძნებს