ოქრუაშვილის პარტიის წევრები ექსპერტიზის დასკვნას არ ენდობიან

ირაკლი ოქრუაშვილის პარტია „გამარჯვებული საქართველოს" წარმომადგენლებმა ცოტა ხნის წინ ოფისში ბრიფინგი გამართეს, სადაც ექსპერტიზის ის შედეგები გააპროტესტეს, რომლის მიხედვითაც ბერლინში ირაკლი ოქრუაშვილსა და ქიბარ ხალვაშს შორის გაფორმებული სადავო ხელშეკრულების დოკუმენტზე ხალვაშის ხელმოწერა არ არის. 

პოლიტიკური მოძრაობის ერთ-ერთი ლიდერი კოტე კემულარია აცხადებს, რომ ეს დასკვნა შსს მინისტრის, გიორგი გახარიას ექსპერტიზის ბიუროს მიერაა გაყალბებული. პარტიის წევრები სამართლებრივ ბრძოლას აგრძელებენ. 

საქმეში სამი დასკვნა უკვე იყო, რომელსაც კიდევ ერთი დასკვნა დაემატა. სადავო დოკუმენტზე ადვოკატი საზღვრებს გარეთ კიდევ ერთი ექსპერტიზის ჩატარებას გეგმავს.

ირაკლი ოქრუაშვილის განცხადებით, „რუსთავი 2“-ის მესაკუთრეა და ტელეკომპანიის 100%-იანი წილი ქიბარ ხალვაშის სახელით შეისყიდა, თუმცა კომპანიის დღევანდელი მფლობელი ამ დოკუმენტს არ აღიარებს და ამბობს, რომ ხელმოწერა გაყალბებულია.

დოკუმენტზე არსებული ხელმოწერის ნამდვილობასთან დაკავშირებით განცხადება 24 ივლისს ირაკლი ოქრუაშვილის ყოფილმა თანაგუნდელმა მიხეილ ქარელმა გააკეთა. მისი განცხადებით, ირაკლი ოქრუაშვილმა ქიბარ ხალვაშის ხელმოწერა გააყალბა და მზად არის, ამასთან დაკავშირებით ჩვენებაც მისცეს.

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი. 

საქართველოს თავდაცვის ყოფილი მინისტრი და პარტია „გამარჯვებული საქართველოს“ ლიდერი ირაკლი ოქრუაშვილი ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით 25 ივლისს დააკავეს.  ის სააპელაციო სასამართლომ 31 ივლისს პატიმრობაში დატოვა.