ირაკლი ოქრუაშვილი დააკავეს

საქართველოს თავდაცვის ყოფილი მინისტრი და პარტია „გამარჯვებული საქართველოს“ ლიდერი ირაკლი ოქრუაშვილი დააკავეს.

ამის შესახებ „ტვ პირველის“ ეთერში ოქრუაშვილის ადვოკატმა ანი რეხვიაშვილმა განაცხადა. დაკავების ფაქტი imedinews-ს შინაგან საქმეთა სამინისტროში დაუდასტურეს. ამ საკითხზე 20:00 საათზე უწყებაში საგანგებო ბრიფინგი დაინიშნა.

ირაკლი ოქრუაშვილი დიღომში კოტე კემულარიას სახლთან დააკავეს. ამის შესახებ „პრაიმტაიმს“ ოქრუაშვილის ადვოკატმა ანი რეხვიაშვილმა უამბო.

„რუსთავი 2“-ში ჩაწერაზე ვიყავით, იქიდან გამოსულები შინ მივემართებოდით, როცა დიღომში, კოტე კემულარიას სახლთან პოლიციის მანქანებით გადაგვიდგნენ და ირაკლი ოქრუაშვილი დააკავეს“, - ამბობს ადვოკატი. 

ანი რეხვიაშვილის განცხადებით, ირაკლი ოქრუაშვილი 20-21 ივნისის საქმეზე სისხლის სამართლის კოდექსის 225-ე მუხლის პირველი და მეორე ნაწილის საფუძველზე დააკავეს. რაც ჯგუფური ძალადობის ხელმძღვანელობას გულისხმობს და ექვს წლამდე პატიმრობას ითვალისწინებს.

20-21 ივნისს განვითარებულ მოვლენებთან დაკავშირებით მაგისტრატი მოსამართლის თანდასწრებით ირაკლი ოქრუაშვილი 23 ივლისს მოწმის სტატუსით გამოიკითხა.

20 ივნისს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

რუსთაველის გამზირზე საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.