გუგუტიანთკარის მცხოვრები ელჩებს: მიაწვდინეთ ხმა მსოფლიოს

სოფელ გუგუტიანთკარში, სადაც რამდენიმე დღეა უკანონო ბორდერიზაცია მიმდინარეობს, უცხოელი დიპლომატები და შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი იმყოფებოდნენ.

6 ქვეყნის ელჩები და დიპლომატიური კორპუსის 20-მდე წარმომადგენელი არსებულ სიტუაციას ადგილზე გაეცნო და ე.წ. საზღვრის გავლების სამუშაოები დაგმო. მათ ღიად განაცხადეს, რომ საერთაშორისო თანამეგობრობა საქართველოს ტერიტორიულ მთლიანობას აღიარებს და ის, რაც გუგუტიანთკარში ხდება, ადამიანურად და პოლიტიკურად შემაშფოთებელია. 

"მართლაც სამწუხაროა იმის დანახვა, თუ როგორ აღმოჩნდნენ ადგილობრივ მცხოვრებთა ოჯახები სხვადასხვა მხარეს ახალი ბარიერების აღმართვის გამო. შეშფოთებული ვარ არსებული მდგომარეობით. იაპონია აბსოლუტურად ეწინააღმდეგება საქართველოს საერთაშორისოდ აღიარებული საზღვრების შეცვლას. იმედი მაქვს, რომ ეს გაუარესებული მდგომარეობა უმოკლეს ხანში გამოსწორდება. ოჯახების გახლეჩვა მართლაც რომ სერიოზული პრობლემაა და მე სრულიად მესმის და თანავუგრძნობ იმ ოჯახებს, რომლებსაც  ეს განცალკევება შეეხოთ“, - განაცხადა საქართველოში იაპონიის საგანგებო და სრულუფლებიანმა ელჩმა ტადაჰარუ უეჰარამ.

საქართველოში უკრაინის საელჩოს წარმომადგენლის ბოგდან პეტროვის განცხადებით კი, უკრაინელი ხალხი საქართველოს გვერდით დგას.

"ახლახან ჩვენ აღვნიშნეთ სქართველოს წინააღმდეგ რუსული აგრესიის მე-11 წლისთავი. დღეს კი საოკუპაციო ხაზზე ვდგავართ და სწორედ ამ წუთებში რუსეთის აგრესიული ძალები კვლავ განაგრძობენ საქართველოს ოკუპაციას. მინდა ვთქვა, რომ უკრაინელი ხალხი ქართველი ხალხის გვერდით დგას. უკრაინა მხარს უჭერს საქართველოს სუვერენიტეტსა და ტერიტორიულ მთლიანობას და რუსეთის ფედერაციისგან მოითხოვს საქართველოდან და უკრაინიდან რუსული საოკუპაციო ძალების გაყვანას, ასევე 2008 წლის 12 აგვისტოს „ცეცხლის შეწყვეტის შესახებ“ შეთანხმებით გათვალისწინებული ყველა ვალდებულების შესრულებას", - აღნიშნა პეტროვმა.

გუგუტიანთკარის მოსახლეობა ხელისუფლებას დახმარებას სთხოვს. ისინი ამბობენ, რომ მათ მძიმე სოციალური პრობლემები აქვთ, თუმცა ნომერ პირველი პრობლემა ოკუპაციაა. 

"მე ტყვედ ვიყავი აყვანილი, რუსული ჩექმა მომხვდა. საშინლად მაწამეს, მაგრამ სოფელი არ დამიტოვებია. ამ ხნის ქალი ვარ და ახლაც არ დავტოვებ, მაგრამ შვილებს და შვილიშვილებს რა ვუთხრათ. ძალიან გთხოვთ მიაწვდინეთ ხმა მსოფლიოს", - განაცხადა მსოფლის მცხოვრებმა ეთერ გუგუტიშვილმა.

ოკუპანტები ე.წ. საზღვარს რკინის ბოძებით და მასზე დამონტაჟებული ხელოვნური ბარიერებით ავლებენ. მავთულხლართების მეორე მხარეს რჩება ორი საცხოვრებელი, სახნავ-სათესი სავარგულები და სარწყავი სისტემა, რომელსაც, სავარაუდოდ, ოკუპანტები გააკონტროლებენ. მოსახლეობას რამდენიმე დღე აქვს დარჩენილი იმისთვის, რომ საყოფაცხოვრებო ნივთები გამოიტანოს და მშობლიურ სახლებს გამოემშვიდობოს.

ოკუპანტებმა გუგუტიანთკართან მავთულხლართების მონტაჟი 14 აგვისტოს განაახლეს. 15 აგვისტოს სოფელში მიმდინარე უკანონო სამუშაოებს საქართველოში აშშ-ის საელჩო გამოეხმაურა, საქართველოს საგარეო საქმეთა სამინისტრომ კი საერთაშორისო თანამეგობრობას საოკუპაციო ხაზზე მიმდინარე უკანონო პროცესების სათანადოდ შეფასებისკენ მოუწოდა.