თეა წულუკიანს სკანდალურ შეწყალებასთან დაკავშირებით კითხვები აქვს

იუსტიციის მინისტრ თეა წულუკიანს სკანდალურ შეწყალებასთან დაკავშირებით კითხვები აქვს. როგორც მან ჟურნალისტებთან საუბრისას განაცხადა, საქმის გამოძიება აუცილებელია. ამასთან, მინისტრის თქმით, პრეზიდენტის მიერ გამოცხადებული მორატორიუმი მოკლე ვადებში უნდა დასრულდეს, რადგან ამ ფაქტმა შესაძლოა ზოგიერთი პატიმრის უფლება შელახოს.

„მე არ ვიცი, არსებობს თუ არა კორუფციის ნიშნები, რადგან ამ საქმეზე არსებულ მასალებს არ ვიცნობ, მაგრამ კითხვის ნიშნები არსებობს. ჩემთვის წარმოუდგენელია, რომ საქართველოს ამ პრეზიდენტს, რომელიც ახალი წლის შეწყალების დროს იუსტიციის სამინისტროსთან იყო კონტაქტზე და პირადად ზრუნავდა იმაზე, რომ არ შეეწყალებინა საზოგადოებისთვის საშიში ადამიანები, რისი მოწმეც პირადად მე ვარ, წარმოუდგენელია, რომ რამდენიმე თვეში ამ ადამიანმა ასეთი გადაწყვეტილება მიიღო. ასე რომ კითხვის ნიშნები არსებობს და მე მინდა რომ მორატორიუმი, რომელიც სალომე ზურაბიშვილმა გამოაცხადა, ძალიან მალე დასრულდეს. ეს ალბათ, ამ მომენტში სწორი გადაწყვეტილება იყო, თუმცა მორატორიუმი უნდა იყოს ხანმოკლე. შეწყალების პროცედურის რეფორმა სწრაფად უნდა ჩატარდეს“, - განაცხადა წულუკიანმა.

„ევროპულმა საქართველომ“ პრეზიდენტის მიერ შეწყალებულთა საქმეზე გამოძიების დაწყების მოთხოვნით საქართველოს გენერალურ პროკურატურას 19 სექტემბერს მიმართა. 

პროკურატურამ პრეზიდენტის მიერ შეწყალების საქმეებზე გამოძიება 20 სექტემბერს დაიწყო. ფაქტს გამოეხმაურა პრეზიდენტის ადმინისტრაციაც. 

სალომე ზურაბიშვილს მკვლელობის მუხლით გასამართლებული მსჯავრდებულების შეწყალებასთან დაკავშირებით აკრიტიკებენ. საუბარია 2014 წელს პოლიციელ თარაშ მუკბანიანის მკვლელობისთვის, 2004 წელს დავით ოთხმეზურის მკვლელობისა და 1994 წელს გიორგი ქოიავას მკვლელობისთვის მსჯავრდებულების შეწყალებაზე.

18 სექტემბერს პრეზიდენტმა პატიმრების შეწყალებაზე მორატორიუმი გამოაცხადა.