ზურაბიშვილი ჟენევის დისკუსიების თანათავმჯდომარეების განცხადებას ეხმაურება

საქართველოს პრეზიდენტი დეფაქტო მთავრობის მიერ ე.წ. გამშვები პუნქტის ჩაკეტვის საკითხზე ჟენევის დისკუსიების თანათავმჯდომარეების მიმართვას ეხმაურება. სალომე ზურაბიშვილი Twitter-ზე წერს, რომ ადამიანის უფლებების დაცვის კუთხით პროგრესის იმედი აქვს. 

„მივესალმები ჟენევის დისკუსიების თანათავმჯდომარეების მოწოდებას, საოკუპაციო ხაზთან გადასასვლელი პუნქტების გახსნის თაობაზე. გუშინ, საერთაშორისო საზოგადოებისადმი ჩემი მიმართვის გათვალისწინებით, ადამიანის უფლებების დაცვის მიმართულებით პოზიტიური ძვრების იმედი მაქვს“, - წერს საქართველოს პრეზიდენტი.  

I welcome the call by the Geneva International Discussions Co-Chairs to re-open all crossing points on the occupation line. Following my address to the international community yesterday, I hope for positive progress, for the protection of human rights.

— Salome Zourabichvili (@Zourabichvili_S) November 7, 2019

6 ნოემბერს სალომე ზურაბიშვილმა საერთაშორისო საზოგადოებას მოუწოდა, სასწრაფოდ მოიძებნოს ოკუპირებულ ტერიტორიებზე არსებული ჰუმანიტარული ტრაგედიის ეფექტიანი გადაწყვეტის გზები. 

ჟენევის დისკუსიების თანათავმჯდომარეებმა 6 ნოემბერს განაცხადეს, რომ საოკუპაციო რეჟიმის ჩაკეტილი ე.წ. გამშვები პუნქტები უნდა გაიხსნას. დეფაქტო ხელისუფლების მიერ ე.წ გამშვები პუნქტის ჩაკეტვის გამო ადგილობრივები სამედიცინო მომსახურებით ვერ სარგებლობენ. ახალგორში 60 წლამდე ქალი ჭაში ჩავარდა. მძიმედ დაშავებულის ოჯახი ცხინვალის საავადმყოფოში მყოფი პაციენტის თბილისში სამკურნალოდ გადმოყვანას ისევ ითხოვს.