მარგველაშვილი მომავალ საპრეზიდენტო არჩევნებში მონაწილეობას არ ადასტურებს

საქართველოს პრეზიდენტი გიორგი მარგველაშვილი არ აკონკრეტებს, მიიღებს თუ არა მონაწილეობას საპრეზიდენტო არჩევნებში. “იქნება კი საპრეზიდენტო არჩევნები და რა უფლებამოსილების პრეზიდენტი გვეყოლება საქართველოში?!“, - ამის შესახებ მარგველაშვილმა „პალიტრანიუსის“ ეთერში, გადაცემაში „360 გრადუსი“ განაცხადა.

„არ გამიკეთებია განცხადება, რომ არჩევნებში მონაწილეობას ვაპირებ და ამბობენ, რომ ვერ მოიგებსო. მათ თუ უფრო მეტი ინფორმაცია აქვთ ჩემ შესახებ, ვიდრე მე მაქვს, არ ვიცი...“, - აღნიშნა გიორგი მარგველაშვილმა.

საქართველოს პრეზიდენტმა კიდევ ერთხელ აღნიშნა, რომ ის პოლიტიკურ გარიგებებზე არასდროს წავა. მარგველაშვილის თქმით, კონსტიტუციით მისი დაინტერესება პოლიტიკოსების მხრიდან „არასწორად იქნა ნათარგმნი“. პრეზიდენტი ამბობს. რომ იყო ასევე სატელევიზიო ეთერებით შეთავაზებები, რომ 2018 წელს საპრეზიდენტო არჩევნები იმ შემთხვევაში ჩატარდება პირდაპირი წესით, თუკი მისი განცხადებები მკვეთრი არ იქნება.

„პრობლემურია, რაც მთელი ამ პერიოდის განმავლობაში ხდება. ეს არის ის, რომ ჩემი დაინტერესება კონსტიტუციით რაღაცნაირად იქნა ნათარგმნი იმ მხრივ, რომ ეს არის რაღაც ჩემი ინტერესი, როგორი საკონსტიტუციო მოდელი იქნება. რომ პირადად ჩემი ინტერესია, იქნება თუ არა პრეზიდენტი არჩეული პირდაპირ, რა უფლებამოსილებები ექნება და ეს უკავშირდება ასე ვთქვათ ჩემს პოლიტიკურ არჩევნებს. მეტიც პირდაპირ ეთერში შეთავაზებები იყო - თუ პრეზიდენტი არ გააკეთებს მკვეთრ განცხადებებს, მაშინ 2018 წელს იქნება არჩევნები და თუ ისე გამოვა, რომ ჩვენ არ მოგვეწონება, მაშინ არჩევნები არ იქნება. არასდროს, ქვეყნის უზენაესი კანონის ინტერესებიდან გამომდინარე, არ წავალ ამ პოლიტიკურ გარიგებებზე. ვინც წავა ასეთ გარიგებებზე, იცოდეთ, რომ ძალიან არასწორ ნაბიჯს დგამთ. კონსტიტუციასთან თამაში ეს არის ჩვენს მომავალთან თამაში, არა თანამდებობებთან“, - განაცხადა გიორგი მარგველაშვილმა.

პრეზიდენტ კონსტიტუციის საერთო-სახალხო განხილვებსაც გამოეხმაურა. მისი აზრით, კონსტიტუციის პროექტის საერთო-სახალხო განხილვებზე ზოგიერთი „მოყვანილი ტაშის დამკვრელია“, მაგრამ ისინიც საქართველოს მოქალაქეები არიან, რომელთა აზრი საინტერესოა.

„რა თქმა უნდა, როდესაც უყურებ დარბაზს ცოტა გამოცდილი თვალით, ხვდები - ერთად რომ სხედან, ტაშს რომ უკრავენ, მესიჯს რომ იღებენ, რომ დგებიან და ფურცლიდან კითხულობენ, ხვდები, რომ ეს მომზადებული ჯგუფია, მაგრამ ისინი რა, საქართველოს მოქალაქეები არ არიან?! “, - განაცხადა გიორგი მარგველაშვილმა.