განათლების სამინისტრო სკოლაში ბავშვების მიერ თვითდაზიანების ფაქტს ადასტურებს

განათლების მინისტრის მოადგილე ლია გიგაური სკოლაში ბავშვების მიერ თვითდაზიანების შესახებ გავრცელებულ ინფორმაციას ადასტურებს. მისი განცხადებით, მოსწავლეები ინტერნეტთამაშ "ლურჯ ვეშაპში" მონაწილეობას უარყოფენ. ინფორმაციას 1tv.ge ავრცელებს.

"დღევანდელ შემთხვევაში მონაწილე ბავშვები არ ადასტურებენ ინტერნეტთამაშში ჩართვას - ეს გასაგებიცაა, მათი ასაკიდან და შიშებიდან გამომდინარე, რომ დაისჯებიან", - განაცხადა გიგაურმა

"დღეს სკოლის მასწავლებელს გაუჩნდა ეჭვი, რომ ერთი მოსწავლე, რომელსაც ხელები ჰქონდა დასერილი, დაკავშირებული იყო რისკთან, ამიტომ, შეამოწმა სხვა მოსწავლეებიც და მაშინვე შეატყობინა მანდატურის სამსახურს, ასევე პოლიციას“, - განმარტავს ლია გიგაური და დასძენს, რომ ამ თამაშის შესახებ ინფორმაცია სამინისტრომ 1 წლის წინ მიიღო და სკოლის დირექტორებისა და მასწავლებლებისთვის ტრენინგების ჩატარება დაიწყო.

"ერთი თვის წინ, გარკვეული ტალღის აგორებასთან დაკავშირებით, ასევე, შემოსულ ინფორმაციას დავეყრდენით და ვთხოვეთ სკოლის მასწავლებლებს და დირექტორებს, რომ გააფრთხილონ მშობლები, დაკვირვებით იყვნენ, მაქსიმალურად გათვალონ რისკები და დააკვირდნენ შვილების ქცევას. ასევე, მასწავლებლებს აქვთ დავალება, რომ დაკვირვებით იყვნენ, მოსწავლეს თუ აღმოაჩნდება რაიმე ისეთი ნიშანი - როგორიცაა ხელების დასერვა, სწრაფად მოახდინონ რეაგირება", - განაცხადა განათლების მინისტრის მოადგილემ.

გიგაურის თქმით, მათ დღეს კიდევ ერთხელ გააფრთხილეს სკოლები, მშობლებთან კომუნიკაცია განაგრძონ.

"დღეს, როდესაც ეს ინფორმაცია მივიღეთ, განმეორებით გავაფრთხილეთ სკოლები, რომ კვლავ გააგრძელონ მშობლებთან კომუნიკაცია. თითოეულმა დამრიგებელმა აუხსნას მისი კლასის მშობლებს, თუ რა რისკებთანაა დაკავშირებული მათი შვილების ამ თამაშში ჩართვა. როგორც ჩვენთვის ცნობილია, ამ თამაშში ჩართვა და კომუნიკაცია საღამოს პერიოდში ხდება და ამიტომ, ოჯახის წევრების მხრიდან ნამდვილად სჭირდება დაკვირვება და მონიტორინგი, რას თამაშობს ბავშვი, რომელ საიტებზე შედის და რა რისკებთან არის დაკავშირებული იმ კონკრეტულ თამაშში ჩართვა“, - განაცხადა ლია გიგაურმა.

ცოტა ხნის წინ ცნობილი გახდა, რომ თბილისში შვიდმა მოსწავლემ თვითდაზიანება მიიყენა. დღესვე შსს განცხადება გაავრცელა, რომ ინტერნეტთამაშთან დაკავშირებით, რომელიც ახალგაზრდებისთვის საშიშია, უწყებამ გამოძიება დაიწყო.

28 მაისს, საქართველოში, 12 წლის გოგო ე. წ. კურატორის დავალებით მე-5 სართულიდან გადახტა. ის სხეულის მრავლობითი დაზიანებით საავადმყოფოში წევს. ფაქტზე მიმდინარეობს გამოძიება.