ალეკო ელისაშვილი: მთელი დღეა ვცდილობ გადავარჩინო მოლაპარაკების პროცესი, რომლის საბოტაჟსაც შიგნით ბაქრაძე, გარეთ კი ბოკერია-უგულავა ეწევა

„ქართულმა ოცნებამ“ ოთხივე საკითხზე, რომელიც მივიტანეთ, უკან დაიხია. მე რისიც მწამს და მჯერა, მივაწვები ბოლომდე. მთელი დღეა ვცდილობ გადავარჩინო მოლაპარაკების პროცესი, რომლის საბოტაჟსაც ბოკერიას პარტია ეწევა, შიგნით ბაქრაძე, გარეთ ბოკერია-უგულავა, - ამის შესახებ „მოქალაქეების“ ლიდერმა, ალეკო ელისაშვილმა „მთავარი არხის“ ეთერში განაცხადა.​

მისი თქმით, პარლამენტში შესვლასთან დაკავშირებით პირველი განცხადებების შემდეგ შეიცვალა ის, რომ „ქართულმა ოცნებამ“ უკან დაიხია ოთხივე საკითხზე, რომელიც ოპოზიციამ მოლაპარაკებების მაგიდასთან მიიტანა.

​„დღეს წარმოჩინდა, რომ ალეკო შედის პარლამენტში. არა, მე დღეს მთელი დღეა ვცდილობ, გადავარჩინო მოლაპარაკების პროცესი, რომლის ჩაშლასაც, საბოტაჟს ეწევა ბოკერიას პარტია, შიგნით ბაქრაძე, გარეთ ბოკერია-უგულავა. ვადამდელ არჩევნებზე ხელისუფლებამ გვითხრა, რომ გადავთვლით, აღმოვაჩენთ გაყალბებას და ვადამდელი ჩატარდებაო. მოლაპარაკებებზე მოიტანეს ეს. დეტალებს ვერ ვიტყვი. ოთხივე საკითხზე უკან დაიხიეს, რიგგარეშე ხომ იყო მათი წითელი ხაზი. ვივარგოთ, დავამტკიცოთ, რომ გაყალბდა. ყველაფერზე მოდიან და არის ძალიან სანდო მეთოდები, რითაც შევძლებთ დავუმტკიცოთ”, – განაცხადა ალეკო ელისაშვლმა.

ამავე დროს, ელისაშვილი არ ამბობს, რა მეთოდებით შეიძლება არჩევნების შედეგების გადამოწმება და გაყალბების დადგენა. თუმცა აღნიშნავს, რომ სანდო მეთოდები არსებობს.