თეთრი ხმაურის მოძრაობა Gem Fest-ს რეკომენდაციებს აძლევს

თეთრი ხმაურის მოძრაობა GEM fest-ზე მყოფი რამდენიმე ადამიანის მძიმე ინტოქსიკაციის ფაქტს ეხმაურება და შესაბამის რეკომენდაციებსაც გასცემს ინტოქსიკაციის გამომწვევი შესაძლო ნივთიერების GHB-ის ზემოქმედების შედეგებთან გამკლავების შესახებ.

“GHB, იგივე [G, Georgia Home Boy, Juice] ტოქსიური პრეპარატია ზედოზირების მაღალი რისკებით. ის ცნს-ის დამთრგუნველი მოქმედებით გამოირჩევა და დოზის მცირე ცვლილებაც კი მძიმე ზედოზირების რისკს ქმნის, რის დროსაც ითრგუნება სასუნთქი სისტემა, შესაძლოა ადამიანი ჩავარდეს კომაში და/ან გარდაიცვალოს.

ზედოზირების ნიშნებია: გულყრა, კოორდინაციის დაკარგვა, კრუნჩხვები, სხეულის ტემპერატურის დაცემა, შენელებული სუნთქვა და გულის ცემა, ცნობიერების დაკარგვა, კომა.

არ მისცეთ GHB მიღებულ ადამიანს ჩაძინების შესაძლებლობა (რომც მოგეჩვენოთ რომ ის ცუდად არ არის); 

თუ პირს დაეწყო პირღებინება და ამავდროულად ის უგონოდ არის, ან ვერ მართავს საკუთარ სხეულს, გადააბრუნეთ ის მუცლით ქვემოთ რომ ღებინებამ არ გამოიწვიოს ადამიანის დახრჩობა;

არ მიიღოთ სხვა ნარკოტიკულ საშუალებებთან ერთად. მისი არევა ალკოჰოლთან, სტიმულანტებთან (MDMA, ექსტაზი, ამფეტამინი) ოპიატების ჯგუფის ნარკოტიკულ საშუალებებთან ზრდის ზედოზირების რისკს.

არ დარჩეთ მარტო GHB-ის მოქმედების დროს;

არ მიიღოთ GHB თუ გაწუხებთ გული, თირკმელი ან გაქვთ ეპილეფსიური შეტევები.

კრუნჩხვების შემთხვევაში შეგიძლიათ მიმართოთ ბენზოდიაზეპინების ჯგუფის პრეპარატებს, მაგალითად დიაზეპამი (ვალიუმი), რომლებიც ასევე ცენტრალური ნერვული სისტემის დამთრგუნველები არიან, მაგრამ GHB-ის აგონისტებიც არიან და ამ უკანასკნელის მოქმედების გაუვნებელყოფა შეუძლიათ. 

ყველაზე მძიმე პერიოდი მიღებიდან 20-120 წუთის განმავლობაშია“, ნათქვამია “თეთრი ხმაურის“ მოძრაობის მიერ გავრცელებულ განცხადებაში.

გუშინ გვგიან ღამით Gem Fest-იდან ზუგდიდის რეფერალურ ჰოსპიტალში 6 ახალგაზრდა გადაიყვანეს. მათგან 4 მართვით სუნთქვაზეა იყო. დღეის მდგომარეობით 5 ახალგაზრდა უკვე გაწერილია. საავადმყოფოში მხოლოდ ერთი რჩება.

გუშინ იმავე საავადმყოფოში  Gem Fest-იდან  უცნობი ნივთიერებით მიღებული ინტოქსიკაციით 22 წლის გოგო გარდაიცვალა.