პარლამენტმა ვენეციის კომისიისა და ეუთოს დემოკრატიული ინსტიტუტებისა და ადამიანის უფლებების ოფისის ერთობლივი მოსაზრების პროექტის თარგმანი გამოაქვეყნა

პარლამენტი საქართველოს საარჩევნო კოდექსში ცვლილებების პროექტსა და მოქალაქეთა პოლიტიკური გაერთიანებების შესახებ საქართველოს ორგანულ კანონში ცვლილებების პროექტთან დაკავშირებით, ვენეციის კომისიისა და ეუთოს დემოკრატიული ინსტიტუტების, ასევე ადამიანის უფლებების ოფისის ერთობლივი მოსაზრების პროექტის თარგმანს აქვეყნებს.

ვენეციის კომისია და ეუთო/ოდირი ოპოზიციის ნაწილს აკრიტიკებს. ისინი სამწუხაროს უწოდებენ იმ ფაქტს, რომ ყველა პოლიტიკური პარტია კანონმდებლობის შემუშავების პროცესში ჩართული არ არის. საერთაშორისო ექსპერტები ბოიკოტის გამოცხადებას არ ეთანხმებიან და ამბობენ, რომ ბოიკოტი არ უნდა წარმოადგენდეს პოლიტიკური ვაჭრობის ინსტრუმენტს.

როგორც ცნობილია, დღეს, პარლამენტში გამართულ ბრიფინგზე უმრავლესობის წევრმა, გივი მიქანაძემ განაცხადა, რომ საარჩევნო კანონმდებლობის რევიზიასთან დაკავშირებული ცვლილებების პროექტი ეუთო/ოდირმა და ვენეციის კომისიამ პოზიტიურად შეაფასეს. მისივე თქმით, ეუთო/ოდირმა და ვენეციის კომისიამ წინსწრებით წარმოადგინეს დასკვნის პროექტი, რომლის საბოლოო ვერსიის დამტკიცება ნავარაუდები აქვთ მიმდინარე წლის 15 დეკემბრის სხდომაზე.

მიქანაძის განმარტებით, დასკვნის პროექტში რეკომენდაციებია რიგ საკითხებზე, შემდგომი სრულყოფის მიზნით, რაზეც ჯერ კიდევ პირველი მოსმენის ფორმატში მმართველმა გუნდმა განაცხადა, რომ მეორე მოსმენაზე ამ საკითხების უფრო დეტალურად გაწერს.

წინასწარი შეფასების შემდეგ, პარლამენტში, საარჩევნო რეფორმის მეორე მოსმენით განხილვა იწყება. ოთხშაბათს სამუშაო ჯგუფის სხდომა გაიმართება და დოკუმენტში ის რეკომენდაციები აისახება, რომლებიც პარლამენტს ვენეციის კომისიამ და ეუთო/ოდირმა გადაუგზავნა. იურიდიულ კომიტეტზე კი კანონპროექტებს მუხლობრივად 8 დეკემბერს განიხილავენ. რეფორმამ მთლიანობაში საერთაშორისო ექსპერტებისგან დადებითი შეფასება მიიღო.

5 ოქტომბერს პარლამენტმა პირველი მოსმენით მხარი დაუჭირა სამუშაო ჯგუფის მიერ მომზადებულ და იურიდიულ საკითხთა კომიტეტის მიერ ინიცირებულ პროექტს, რომელიც მოიცავდა შესაბამის ცვლილებებს საარჩევნო კოდექსსა და მოქალაქეთა პოლიტიკური გაერთიანებების შესახებ ორგანულ კანონში, რაც 10 ოქტომბერს ექსპერტული დასკვნისათვის გაიგზავნა ეუთო/ოდირსა და ვენეციის კომისიაში.