წულუკიანი: სტრასბურგის გადაწყვეტილება არ ნიშნავს მერაბიშვილის გათავისუფლების მოთხოვნას

იუსტიციის მინისტრი, თეა წულუკიანი აცხადებს, რომ, როგორც მთავარობის წარმომადგენელი, ის კმაყოფილია სტასბურგის ადამიანის უფლებების სასამართლოს გადაწყვეტილებით მერაბიშვილის საქმესთან დაკავშირებით.

ის გადაცემაში “პირისიპირ“ აცხადებს, რომ 150 გვერდისგან შემდგარი საქმე ბოლოსდაბოლოს დეტალურად განიხილეს. მისი განმარტებით, სტრასბურგმა ქართული სასამართლოს 2013 წლის გადაწყვეტილება მერაბიშვილის წინასწარ პატიმრობაზე კანონიერად მიიჩნია. თუმცაღა დასძინა, რომ როცა მერაბიშვილმა აღმკვეთი ღონისძიების შეცვლა მოითხოვა, ქუთაისის ერთ-ერთმა მოსამართლემ ეს საკითხი ზედაპირულად განიხილა. ანუ, მას უნდა დაესაბუთებინა უკეთესად. 

“სტრასბურგის სასამართლო ვერ უბრძანებს ქუთაისელ მოსამართლეს, როგორი გადაწყვეტილება უნდა გამოიტანოს მან“, - აცხადებს წულუკიანი.

მინისტრი განმარტავს, რომ ამ გადაწყვეტილების საფუძველზე საქართველოს ხელისუფლებას ვანო მერაბიშვილის ციხიდან გამოშვება არ მოუწევს, რადგან სტრასბურგის გადაწყვეტილებით, მისი წინასწარი პატიმრობა იყო კანონიერი. ამასთან, მერაბიშვილი უკვე აღარ არის წინასწარ პატიმრობაში და ის უკვე სასჯელს იხდის.

სტრასბურგის სასამართლოს აღნიშნულ საქმეზე გადაწყვეტილება დღეს გამოაცხადა. 

სტრასბურგის სასამართლოს დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე, გასულ წელს, ამავე სასამართლოს ერთ-ერთი პალატის 14 ივნისს გამოტანილი გადაწყვეტილება გაასაჩივრა. შესაბამისად, აღნიშნული ვერ შევიდა ძალაში აღსასრულებლად.

"მართალია, 14 ივნისის გადაწყვეტილებით სტრასბურგის სასამართლოს პალატამ 7 მოსამართლის შემადგენლობით ერთხმად დაადგინა, რომ ვანო მერაბიშვილის წინასწარი პატიმრობა იყო კანონიერი, თუმცა გაჩნდა კითხვის ნიშანი 2013 წლის 14 დეკემბერს მერაბიშვილის საკნიდან სავარაუდო გაყვანის ეპიზოდთან დაკავშირებით. აღნიშნულს არ დაეთანხმა საქართველოს იუსტიციის სამინისტრო და კონვენციით დადგენილ ვადაში, 2016 წლის 13 სექტემბერს, ეს გადაწყვეტილება დიდ პალატაში გაასაჩივრა", - წერია სამინისტროს განცხადებაში.

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. კონვენციის მე-18 მუხლი უფლებების შეზღუდვათა გამოყენების ფარგლებს ეხება. "საქართველოს ყოფილი შინაგან საქმეთა მინისტრის ვანო მერაბიშვილის წინასწარი პატიმრობა გამოყენებული იქნა არა მხოლოდ იმისთვის, რომ ის სხვადასხვა დანაშაულთან დაკავშირებით „გონივრული ეჭვის“ საფუძველზე პასუხისგებაში მიეცათ, „არამედ პროკურატურამ ის გამოიყენა, როგორც დამატებითი შესაძლებლობა ბერკეტის მოსაპოვებლად“ იმ გამოძიებებთან მიმართებაში, რომლებიც სხვა საქმეებზე მიმდინარეობდა, მათ შორის ექს–პრეზიდენტ მიხეილ სააკაშვილის წინააღმდეგ, განაცხადა ევროპის ადამიანის უფლებათა სასამართლომ 14 ივნისს გამოტანილ განაჩენში.

1 ნოემბერს გავრცელდა ცნობა, რომ ვანო მერაბიშვილმა საპატიმრო შესაძლოა ვადაზე ადრე დატოვოს. თუმცა, მოგვიანებით, სასჯელაღრულების სამინისტრომ ვანო მერაბიშვილის ვადამდე გათავისუფლების შესაძლებლობა უარყო.

ამასთან, ცნობილი გახდა, რომ უზენაესმა სასამართლომ ვანო მერაბიშვილის მიმართ გამოტანილი გამამტყუნებელი განაჩენი ძალაში დატოვა.